Almaty qalasynda Qazaqstan Respýblıkasy Memlekettik qyzmet isteri agenttiginiń Almaty qalasy boıynsha departamenti janyndaǵy Memlekettik qyzmetterdi kórsetý máseleleri boıynsha vedomstvoaralyq jumys toby (VAJT) kóshpeli otyrys ótkizdi.
Otyrystyń negizgi maqsaty – avtokólik 
júrgizýshilerine arnalǵan mamandandyrylǵan halyqqa qyzmet kórsetý ortalyqtarynyń (HQKO) qyzmetin taldaý jáne ony jetildirý joldaryn qarastyrý boldy.
Jıynǵa QR Memlekettik qyzmet isteri agenttiginiń Almaty qalasy boıynsha departamentiniń basshysy Shynaraı Álimhan, Almaty qalasy máslıhatynyń depýtaty, Almaty qalasy Qoǵamdyq keńesiniń tóraǵasy Altynaı Kóbeeva jáne VAJT músheleri qatysty. Jumys toby «Azamattarǵa arnalǵan úkimet» memlekettik korporasıasynyń Almaty qalasy boıynsha fılıaly usynǵan aqparatpen tanysyp, mamandandyrylǵan HQKO-lardyń jumysy barysynda týyndaıtyn máselelerdi jan-jaqty talqylady.
Jıyn barysynda qazirgi tańda elimizde mopedterdi tirkeý jáne olardy basqarý erejelerine qatysty engizilip jatqan ózgerister de nazarǵa alyndy. 2025 jyldyń 5 sáýirinen bastap tirkelmegen mopedterdi basqarýǵa tyıym salynady. Osyǵan baılanysty atalǵan merzimge deıin moped ıeleri óz kólikterin zańdastyryp, qajetti júrgizýshi kýáligin alýy tıis. Jumys toby osy másele boıynsha atqarylyp jatqan sharalarmen tanysyp, ony halyqqa keńinen túsindirý qajettigin atap ótti.
Kóshpeli otyrystyń qorytyndysy boıynsha VAJT «Azamattarǵa arnalǵan úkimet» memlekettik korporasıasynyń Almaty qalasy boıynsha fılıalyna HQKO qyzmetteri týraly aqparattyq-túsindirý jumystaryn kúsheıtip, múgedektigi bar azamattarǵa qolaıly jaǵdaı jasaý, teorıalyq emtıhan tapsyratyn kompúterlerdiń sanyn kóbeıtý, mamandandyrylǵan HQKO-larda medısınalyq tekserý mekemeleriniń sanyn kóbeıtý múmkindigin qarastyrý sekildi birqatar naqty usynystar berdi.
Aıta keteıik, jumys toby mamandandyrylǵan HQKO qyzmetin jaqsartý halyqqa sapaly ári jedel qyzmet kórsetýdiń negizgi tetigi ekenin atap ótti. Aldaǵy ýaqytta bul usynystardyń júzege asyrylýy qala turǵyndarynyń qyzmet alý prosesin aıtarlyqtaı jeńildetýge múmkindik beredi.