Qazaqstanda balalardaǵy kúrdeli kóz aýrýlaryn emdeý ádisteri belsendi túrde jetildirilýde.
Almatynyń Balalar shuǵyl medısınalyq kómek ortalyǵynyń Kóz mıkrohırýrgıasy bólimshesinde Constellation Vision lazerlik hırýrgıalyq júıesiniń kómegimen kúrdeli vıtreoretınaldy patologıalar kezinde operasıalar júrgizile bastaıdy, dep habarlaıdy aqshamnews.kz Densaýlyq saqtaý mınıstrligine silteme jasap.
Vıtreoretınaldy hırýrgıa joǵary tehnologıany qajet etetin torly qabyq pen shyny tárizdi deneniń aýyr aýrýlaryna arnalǵan operasıalardy qamtıdy. Bul baǵyt búkil álemde belsendi damyp keledi.
«Almatynyń Balalar shuǵyl medısınalyq kómek ortalyǵynyń Kóz mıkrohırýrgıasy bólimshesinde bizdiń kishkentaı pasıentterimiz shala týǵan nárestelerdiń retınopatıasyn, otbasylyq ekssýdatıvti vıtreoretınopatıany, Koats retınıtin jáne kózdiń basqa da aýyr aýrýlaryn emdeý boıynsha operasıadan óte alady», — dep atap ótti Almaty qalasy Qoǵamdyq densaýlyq saqtaý basqarmasy basshysynyń mindetin atqarýshy Nazgúl Imanǵalıeva.
Buryn mundaı patologıasy bar balalar kvota boıynsha shetelge jiberiletin. Endi olar Almatyda qajetti kómek ala alady. Sońǵy jyldary Qazaqstanda balalarda torly qabyq pen shyny tárizdi dene patologıasy jaǵdaılarynyń ósýi baıqalady.
«Gadjetterdiń keńinen qoldanylýyn eskere otyryp, vızýaldy patologıa máselesi ózekti bola túsýde jáne lazerlik kórýdi túzetý balalar oftalmologıasynyń mańyzdy mindeti bolyp tabylady. Bizdiń ortalyqtyń bazasynda lazerlik mıkrohırýrgıany engizý emdeýge qoljetimdilikti jaqsartady jáne mamandarymyzdyń biliktiligin arttyrady», - dep atap ótti Ortalyqtyń dırektory Álibek Smaǵulov.
«Osy jyldyń qańtar-qazan aılary aralyǵynda 57 qazaqstandyq bala vıtreoretınaldyq operasıalar úshin shetelge shyǵýǵa májbúr boldy. Jańa jabdyqtyń arqasynda ata-analar budan bylaı sheteldegi operasıalarǵa qarajat izdemeıdi», - dep tolyqtyrdy AYALA qorynyń prezıdenti Aıdana Súleımenova.
Ortalyq «Shevron» kompanıasynyń qoldaýymen AYALA qaıyrymdylyq qorynyń arqasynda Constellation Vision zamanaýı lazerlik hırýrgıalyq júıesin aldy.