Almaty qalasynda kúzet agenttigi retinde tirkelip, zańsyz árekettermen aınalysqan qarýly uıymdasqan qylmystyq top (UQT) áshkerelendi.
Qylmystyq toptyń músheleri kásipkerlerge qysym kórsetip, nysandaryn kúshpen tartyp alyp otyrǵan. Olar adamdardy urlap, bopsalap, fızıkalyq jáne psıhologıalyq zorlyq-zombylyqqa da barǵan, dep habarlaıdy aqshamnews.kz.
İshki ister mınıstrliginiń habarlaýynsha, bul top oıyn-saýyq oryndarynyń ıeleri men qyzmetkerlerine kúsh qoldaný arqyly kásipkerlik nysandaryn ıemdenip, keıin sol jerde «qaýipsizdik qyzmetin» atqarǵan syńaı tanytqan.
Uıymdasqan qylmystyq topty UQTB (Uıymdasqan qylmysqa qarsy kúres basqarmasy) qyzmetkerleri UQK men prokýratýranyń úılestirýimen joıdy. Arnaıy operasıa nátıjesinde Almaty, Jetisý, Túrkistan, Mańǵystaý, Jambyl jáne Almaty oblystarynda toptyń 20 múshesi ustaldy.
Tergeý barysynda 40-tan astam tintý júrgizilip, 7 birlik atys qarýy – onyń ishinde 3 kesilgen ańshy myltyǵy, Makarov tapanshasy, Kalashnıkov avtomaty jáne 100-den astam oq-dári tárkilendi. Bul týraly İİM uıymdasqan qylmyspen kúres departamentiniń ókili Qýandyq Alpys málimdedi.
Qazirgi ýaqytta buzaqylyq, bopsalaý, adam urlaý, óz betimen áreket etý jáne densaýlyqqa zıan keltirý derekteri boıynsha qylmystyq ister tergelip jatyr. Sonymen qatar, top basshysy men múshelerine qatysty UQT qurý, oǵan jetekshilik etý jáne qatysý boıynsha sotqa deıingi tergeý amaldary júrgizilýde. Olar basqa da osyǵan uqsas qylmystarǵa qatysy bar-joǵy boıynsha tekserilýde.
İİM málimdeýinshe, bızneske qysym kórsetý jáne qylmystyq aralasý áreketteri memleket baqylaýynda. Zańǵa qaıshy kez kelgen áreket qatań túrde toqtatylady.