Aýrýhanaǵa jatqyzylǵan naýqastar sany ósip jatyr.
Almaty qalasy qoǵamdyq densaýlyq basqarmasynyń basshysy Narıman Tabynbaev Óńirlik komýnıkasıalar qyzmetinde ótken brıfıńte halyqty taǵy da vaksına alýǵa shaqyrdy. Ol júktemeniń dárigerlerge, ásirese, alǵashqy medısınalyq kómekke edáýir artqanyn aıtty, dep habarlady Almaty-akshamy.kz.
Qalalyq densaýlyq basqarmasy basshysynyń aıtýynsha, aýrýhanaǵa jatqyzylǵan naýqastar sany ósýde. Eger bir aı buryn bul kórsetkish táýligine 40-70 naýqas bolsa, búginde juqpaly aýrýlar aýrýhanasynda emdelýdi qajet etken koronavırýspen aýyratyn naýqastardyń sany 400 adamǵa jetedi.
«Kóptegen naýqastar úıde emdelýde. Qazirdiń ózinde 7 361 naýqas baqylaýda. Telemedısına ortalyǵynyń shtatyn qosymsha mamandardy tarta otyryp, naýqastarǵa qashyqtan keńes beretin 84 qyzmetkerge deıin kóbeıtýge týra keldi», – dedi Narıman Tabynbaev.
QDB basshysy birinshi kezektegi mindet ólim jaǵdaıynyń kóbeıýine jol bermeý ekenin aıtty.
«Almatyda "jedel járdem" shaqyrýdyń táýliktik sany 2 700-ge jetti. Shilde aıynda JRVI, KVI jáne pnevmonıamen shaqyrýdyń úlesi 2 ese artty. Táýekel tobynda áli de sozylmaly aýrýlarmen aýyratyn adamdar bar», – dedi spıker.
Narıman Tabynbaevtyń aıtýynsha, jańa «delta» shtamy jastar qaýymyna qaýipti. Almatyda 40 jasqa deıingi 2 adam koronavırýstan qaıtys boldy.
«Koronavırýstyń jańa shtamyn juqtyrǵan naýqastardyń jaǵdaıy alty saǵat ishinde nasharlaýda», – dep tolyqtyrdy QDB basshysy.
Eske salsaq, KVI taralýyna qarsy turýdyń jalǵyz joly vaksına alý. N.Tabynbaev almatylyqtardy óz densaýlyǵy men jaqyndarynyń densaýlyǵyn saqtaý úshin belsendi túrde vaksına alýǵa shaqyrdy.
Almatyda ekpe pýnktteriniń keń jelisi ashyldy. Kún saıyn 15-20 myńǵa deıin ekpe alýǵa múmkindik bar. 26 shildedegi jaǵdaı boıynsha, vaksınanyń 1-shi komponentiniń 768 545 dozasy jáne 2-shi komponentiniń 499 185 dozasy alyndy.