Almatyda múgedektigi bar adamdardy áleýmettik qoldaýǵa 13,2 mlrd teńge bólindi
Megapolıste bólinetin qarjy kólemi jyl saıyn artyp keletini týraly Óńirlik komýnıkasıalar qyzmetiniń brıfıńinde Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov aıtty, dep habarlady almaty-akshamy.kz.
Spıkerdiń málimetinshe, Almatyda 56 myńnan astam múgedek adam turady (I top - 5 698 adam, II top – 22 752 adam, III top – 18 839 adam, 18 jasqa deıingi múgedektigi bar balalar – 8 930 adam).
“Búgingi tańda múgedektigi bar 33 847 adam tehnıkalyq quraldarmen jáne ońaltý qyzmetterimen qamtamasyz etýge júgindi, onyń ishinde 26 136 adam qajetti quraldarmen jáne qyzmettermen sátti qamtamasyz etildi. Jyl sońyna deıin múgedektigi bar adamdardy qamtamasyz etýdi 90% - ǵa deıin jetkizýdi josparlap otyrmyz”, - dedi B.Jaýbasov.
Sondaı-aq, qalada kreslo-arbalardyń bólshekterin jóndeý jáne aýystyrý boıynsha tegin ortalyq jumys isteıdi. Arba jóndeý sheberhanasy 470 múgedek adamǵa qyzmet kórsetti. 2023 jyly kreslo-arbalardy jóndeý boıynsha keminde 600 qyzmet kórsetý josparlanýda.
Múgedektigi bar adamdarǵa jáne júrip-turýy qıyn múgedektigi bar balalarǵa qosymsha “Invataksı” qyzmetteri usynylady. “Invataksı” qyzmetimen qamtamasyz etý 100 avtokólikke Memlekettik áleýmettik tapsyrys arqyly júzege asyrylady, sondaı-aq «Iandeks taksı» taksı agregatory arqyly qyzmetti iske asyrý boıynsha pılottyq joba iske qosyldy, bul qyzmetke muqtaj adamdardy qamtýdy ulǵaıtýǵa múmkindik berdi.
Múgedek adamdardy jan-jaqty qoldaý jáne olardy qoǵamǵa yqpaldastyrý úshin qalada “Ten Qogam” áleýmettik qoldaý ortalyǵy jumys isteıdi.
“Aǵymdaǵy jyly Almaty qalasy ákiminiń “Ten Qogam” múgedektigi bar adamdardy áleýmettik qoldaý ortalyǵy” áleýmettik jobasyn masshtabtaý jónindegi tapsyrmasyna sáıkes osyndaı 7 ortalyqty ashý boıynsha sharalar qabyldandy. Jyl basynan beri “Ten Qogam” ortalyqtarynda 3 065 adam qyzmet aldy”, - dep atap ótti spıker.
Sondaı-aq, B.Jaýbasov basqarmaǵa qarasty 10 medısınalyq-áleýmettik mekemeniń jumysyn atap ótti. Onda múgedekterge, múgedek balalarǵa, zeınetkerlerge jáne qıyn ómirlik jaǵdaıǵa tap bolǵan adamdarǵa stasıonar, jartylaı stasıonar, úıde qyzmet kórsetý jáne ýaqytsha bolý jaǵdaılarynda arnaýly áleýmettik qyzmetterdiń 8 túri kórsetiledi.
Máselen, “Shańyraq” áleýmettik qyzmetter ortalyǵynda stasıonar jaǵdaıynda 288 jalǵyzbasty ardagerler, zeınetkerler, kútimge, turmystyq jáne medısınalyq qyzmet kórsetýge, áleýmettik-eńbekke beıimdeýge muqtaj múgedekter turady. Ortalyqta fızıoterapıalyq, emshara, stomatologıalyq kabınetter, eńbek terapıasy kabınetteri, sensorlyq bólme, LFK kabıneti, massaj kabınetteri bar. Sondaı-aq, ınsýlt, ınfarkt alǵan adamdar jáne táýlik boıy baqylanatyn tirek-qımyl apparaty buzylǵan múgedekter qaralatyn pallıatıvtik bólimshe bar.
“Demeý” áleýmettik qyzmetter ortalyǵynda stasıonar rejıminde 1 jáne 2 toptaǵy psıhonevrologıalyq aýrýlary bar 18 jastan asqan 667 adam turady.
“Senim” áleýmettik qyzmetter ortalyǵynda 3 jastan 18 jasqa deıingi psıhonevrologıalyq patologıasy bar 110 múgedek bala turady. Sondaı-aq 30 balaǵa arnalǵan pallıatıvtik bólim bar. serebraldy sal aýrýy, Daýn aýrýy, aýyr jáne tereń aqyl-oı jetkiliksizdigi, psıhıkalyq jáne motorlyq damýdyń keshigýi dıagnozy qoıylǵan balalar táýlik boıy osynda bolady. Ortalyq arnaıy jabdyqtarmen, áleýmettik-turmystyq baǵdarlaý kabınetimen, oqý synybymen, sensorlyq kabınetpen, fızıo-kabınetpen, defektolog, logoped, LFK kabınetterimen jabdyqtalǵan.
“Shapaǵat” áleýmettik qyzmetter ortalyǵy jartylaı stasıonar rejıminde psıhonevrologıalyq patologıasy jáne tirek-qımyl apparaty buzylǵan 1,5 jastan 18 jasqa deıingi 80 balaǵa qyzmet kórsetedi. Ata-analar balalardy balabaqshadaǵydaı ortalyqta 8 saǵatqa qaldyrady, óıtkeni olar bos bolmaýy nemese jumys isteýi múmkin. Bul ortalyqtyń Alataý, Bostandyq, Naýryzbaı jáne Túrksib aýdandarynda 5 bólimshesi bar.
Budan basqa, “Aıala” jartylaı stasıonarlary jumys isteıdi, onda 235 adamǵa, “Parasat” ortalyǵynda - 1,5 jastan 18 jasqa deıingi múgedektigi bar, psıhonevrologıalyq patologıasy bar, tirek-qımyl apparaty buzylǵan jáne psıhonevrologıalyq aýrýlary bar 18 jastan asqan 269 adamǵa qyzmet kórsetiledi. Atalǵan jartylaı stasıonarlarda múgedekter ońaltýǵa qalady, biraq 4 saǵatqa ǵana.
“Aǵa býyn azamattarynyń ómir súrý sapasyn arttyrýǵa, olardyń belsendi zıatkerlik, shyǵarmashylyq, qoǵamdyq qyzmetke tartylýyna jáne urpaqtar sabaqtastyǵyna járdemdesýge baǵyttalǵan júıeli mádenı-demalys jumysy úshin ótken jyly kúnine 150 adamnyń baryp turýy úshin belsendi uzaq ómir súrýdiń memlekettik ortalyǵy ashyldy”, - dep atap ótti basqarma basshysy.
Bıyl ortalyqta 1 742 zeınetker tirkelgen, olar 48 myńnan astam saýyqtyrý qyzmetterin alǵan, túrli baǵyttar boıynsha kýrstardan ótip, bos ýaqytyn ótkizedi.