Arslan Qurmanbekov taý bókterindegi órtti sóndirý kezinde qaza tapty
Prezıdent Jarlyǵymen Almatynyń irgesindegi tótenshe oqıǵa kezinde qaza tapqan órt sóndirýshi Arslan Qurmanbekov İİİ dárejeli «Aıbyn» ordenimen marapattaldy, dep habarlaıdy Almaty-akshamy.kz.
«Memleket basshysynyń Jarlyǵymen qyzmettik boryshyn atqarýda kórsetken batyldyǵy men janqıarlyǵy úshin Tótenshe jaǵdaılar mınıstrliginiń Almaty qalasy Tótenshe jaǵdaılar departamenti órt sóndirý jáne avarıalyq-qutqarý jumystary qyzmeti №7 órt sóndirý bóliminiń aǵa órt sóndirýshi-qutqarýshysy Arslan Joldasbekuly Qurmanbekov İİİ dárejeli «Aıbyn» ordenimen nagradtaldy (marqum)», - dep jazdy Aqordanyń resmı saıty.
Arslan Joldasbekuly Qurmanbekov – azamattyq qorǵanys serjanty
1994 jyly 23 tamyzda Almaty oblysy Talǵar aýdany Talǵar qalasynda dúnıege kelgen.
Eńbek jolyn Almaty qalasy TJD «ÓSjAQJQ» MM №9 mamandandyrylǵan órt sóndirý bóliminde órt sóndirýshi-qutqarýshy retinde bastaǵan.
Almaty qalasy TJD «ÓSjAQJQ» MM №1 órt sóndirý bóliminde órt sóndirýshi, aǵa órt sóndirýshi-qutqarýshy bolyp qyzmet atqarǵan.
Tótenshe jaǵdaılar mınıstrligi Almaty qalasy Tótenshe jaǵdaılar departamenti órt sóndirý jáne avarıalyq-qutqarý jumystary qyzmeti №7 órt sóndirý bóliminiń aǵa órt sóndirýshi-qutqarýshysy laýazymyna 2019 jyly taǵaıyndalǵan.
Bıyl 8 mamyrda Arslan Qurmanbekov İle-Alataý tabıǵı parkiniń taý bókterindegi órtti sóndirgen jedel toptyń quramynda qyzmettik boryshyn atqara júrip, qaıǵyly jaǵdaıda qaza tapty.