Almaty ákimi Erbolat Dosaev dárigerlerdi kásibı merekesi qarsańynda quttyqtady
Almaty ákimi Erbolat Dosaev jańa korpýsy ashylǵan Qazaq kóz aýrýlary ǵylymı-zertteý ınstıtýtynda bardy, dep habarlaıdy almaty-akshamy.kz
90 jyldyq tarıhy bar kóz aýrýlary ınstıtýty búginde Qazaqstan men Ortalyq Azıa óńirindegi oftalmologıalyq qyzmettiń flagmany sanalady. Instıtýtta jyl saıyn 250 myńnan astam qazaqstandyq tekserilip, ambýlatorıalyq em alyp jatyr, 20 myńnan astam ota jasalyp, júzdegen naýqas alys jáne jaqyn shetelderden emdelýge keledi.
Joǵary suranys pen joǵary tehnologıalyq jedel aralasýǵa, qolaıly jaǵdaı jasaýǵa degen qajettilikti eskere otyryp, ınstıtýttyń Almatydaǵy óndiristik bazasyn keńeıtý týraly sheshim qabyldandy.
Megapolıs basshysy sońǵy úlgidegi oftalmologıalyq jabdyqtarmen jaraqtandyrylǵan oftalmodıagnostıka bólimshesi, konsýltatıvtik-ońaltý bólimshesi, refraksıalyq hırýrgıa bólimshesi, lazerlik hırýrgıa jáne ortokeratologıa kabınetteri, naýqastarǵa barynsha qolaıly jaǵdaı jasalǵan táýlik boıy jumys isteıtin 30 oryndyq stasıonar bólimshesi ornalasqan QazQSǴZI jańa korpýsyn qarap shyqty.
Ásirese, Erbolat Dosaev balalar men jasóspirimderde kóz aýrýlaryn erte anyqtaýdyń, sondaı-aq zamanaýı tásildermen aldyn alý men emdeýdiń mańyzyn atady.
Búginde QazQSǴZI mamandary mektepterde balalardyń alystan nashar kórýshiligin erte anyqtaý úshin skrınıng júrgizedi. Alysqa kózi jetpeýshiliktiń damýyn boldyrmaý men emdeý úshin kóp elde ortokeratologıalyq (túngi) lınza ádisi qoldanylady. Alaıda QazQSǴZI bas dırektory Neılá Aldasheva atap ótkendeı, bizde emniń bul túri MÁMS-pen qamtylmaǵan.
Qala basshysy balalardy emdeýdiń osy túrin qalalyq deńgeıde engizý boıynsha qoldaý kórsetý múmkindigin qarastyrýdy usyndy.
«Qala turǵyndarynyń, ásirese balalardyń densaýlyǵy men ómir sapasy mańyzdy másele, bul meniń jeke baqylaýymda», - dedi Erbolat Dosaev.
Sondaı-aq, Almaty ákimi kardıohırýrgıalyq operasıalyq blok pen reanımasıa bólimshesine jańǵyrtý júrgizilgen Qalalyq kardıologıalyq ortalyqtyń qyzmetimen tanysty.
Munda kardıologıada jańa tásilder engizilgen TAVI-ortalyq ashylǵan. Endi dástúrli hırýrgıalyq ádisterge qarsy kórsetilimi bar naýqastar kómek ala alady.
Qalalyq kardıoortalyqta biregeı tehnologıanyń arqasynda pasıentterdiń stasıonarda ortasha bolýy 8,8-den 7,5 kúnge deıin qysqardy, qabyldaý jylyna 10 myń pasıentke deıin ulǵaıdy.
Sóz sońynda Erbolat Dosaev qalanyń medısınalyq qyzmetkerin kele jatqan kásibı mereke - Medısına qyzmetkerleri kúnimen quttyqtady. Pasıentter men dárigerler úshin zamanaýı, qolaıly jaǵdaı jasaýǵa erekshe kóńil bólinetinin aıta kele, shahar basshysy medısına qyzmetkerlerine eńbegi úshin alǵys bildirip, qoǵamnyń densaýlyǵy jolynda zor jetistik pen tabys tiledi.
