Qaýipti indettiń júrekke qalaı áser etip, vaksınany keıinge qaldyrýdyń qandaı qajettiligi bary jaıynda Kardıologıa jáne ishki aýrýlar ǵylymı-zertteý ınstıtýty basqarma tóraǵasynyń orynbasary, medısına ǵylymdarynyń kandıdaty Qurmanǵazy Madalıev Óńirlik komýnıkasıalar qyzmeti alańynda ótken baspasóz konferensıasynda málimdedi. İs-shara Dúnıejúzilik júrek kúni aıasynda ótti, dep habarlaıdy almaty-akshamy.kz
Qurmanǵazy Madalıevtiń aıtýynsha, koronavırýs organızmde birqatar ózgerister týdyrady. Bul júrek-qan tamyr júıesine de áser etedi. Qan uıýynyń buzylýy mıkrotrombtardyń paıda bolýyna, al tamyr qabyrǵasynyń qattylyǵynyń ózgerýi qan qysymynyń joǵarylaýyna ákeledi. Bul vırýstyń keıbir saldary. Kovıd, ásirese, júrek pen qan tamyrlary aýrýlary bar adamdardyń densaýlyǵyna zıan tıgizýi múmkin. Aýrý qalypty jaǵdaıdy nasharlatyp, daǵdarysqa ákelýi múmkin.
«Koronavırýsty juqtyrǵan barlyq adamda júrek pen qan tamyrlary problemalary bolady dep aıtý bolmaıdy. Táýekel tobyndaǵy adamdar birinshi orynda. Tájirıbe kórsetkendeı, ıshemıalyq aýrý, arterıalyq gıpertenzıa sıaqty sozylmaly aýrýlary bar, endokrındik júıeniń problemalary bar adamdarda qant dıabeti, artyq salmaq, qart adamdarda tromb túzilýiniń joǵarylaýy baıqalady. Júrektiń ıshemıalyq aýrýy, tamyrlardyń aterosklerotıkalyq zaqymdanýy bar emdelýshilerde koronarlyq tamyrlardyń mıkrotrombozyna baılanysty qaıtalanatyn ınfarkt bolýy múmkin. Sondyqtan sozylmaly aýrýlary bar naýqastarǵa asa saq bolý kerek», - deıdi kardıolog.
Qurmanǵazy Madalıev júrekti nyǵaıtatyn eń jaqsy «vıtamın» belsendi demalys, durys tamaqtaný, uıqy men sergektik, turaqty dene belsendiligi: serýendeý, fızıoterapıalyq jattyǵýlar, júgirý ekenin atap ótti.
Ǵylymı-zertteý ınstıtýty basqarma tóraǵasynyń orynbasary kardıohırýrgtardyń múmkindikteri týraly aıtty.
«Bizdiń ınstıtýtta biz aorta stenozy men kenetten qaıtys bolý qaýpi joǵary naýqastarǵa operasıa jasaımyz. Múmkindikter men jańashyl kózqarastyń arqasynda biz pasıentterdiń ómirin saqtap, jaqsarta alamyz. 2020 jyldyń qańtarynan bastap bizdiń ınstıtýttyń kúndizgi stasıonarynda dıagnostıkalyq koronarografıa ambýlatorıalyq jaǵdaıda júrgiziledi. Biz júrektiń kúrdeli arıtmıasyn katetermen emdeý salasynda ınovasıalyq tehnologıalardy qoldanamyz», - dedi Qurmanǵazy Madalıev.
Ol ınstıtýt qart naýqastarǵa qyzmet etetinin, mysaly, eń úlkeni 94 jasta ekenin aıtty. Onyń ústine barlyq otalar aqysyz júzege asyrylady.