Almatyda koronavırýs juqtyrǵan 637 naýqas em qabyldap jatyr. Bul týraly qalalyq Qoǵamdyq densaýlyq basqarmasynan málim etti, dep habarlaıdy almaty-akshamy.kz
21 qarasha kúngi aqparat boıynsha, bir táýlikte qalada 127 adam koronavırýs juqtyrǵan. Munyń ishinde sımptomdy, jeńil jáne ortasha deńgeıdegi belgilermen – 116, sımptomsyz – 11 naýqas tirkeldi. Barlyq emdelip shyqqandar – 14, kelip túskeni – 38. «Infeksıalyq stasıonarlarda 637 adam bar (tósek-orynnyń jalpy sany –1774), onyń ishinde 24 bala emdelýde», – dep naqtylady Qoǵamdyq densaýlyq basqarmasynyń baspasóz qyzmetinen.
Sondaı-aq, reanımasıa jáne qarqyndy terapıa bóliminde 68 adam jatyr. Al 24 naýqas jasandy tynys alý apparatyna qosylǵan. Invazıvti emes jasandy tynys alý apparatynda 36 adam em qabyldaýdy jalǵastyrýda. High flow-da 9 apparat jumys isteıdi.
Medısınalyq-sanıtarıalyq alǵashqy kómek mobıldi brıgadalarynyń jáne Telemedısına ortalyǵynyń ambýlatorıalyq baqylaýynda 1077 pasıent bar.
Onyń ishinde indet belgileri bar, ortasha aýyr jaǵdaıda – 1019 naýqas. 58 adamda koronavırýs belgileri joq.