Almatyda Psıhıkalyq densaýlyq ortalyǵynyń bazasynda bir aıǵa jýyq ýaqyt ishinde ınfeksıalyq stasıonar ashyldy.
Onyń jumysy jáne COVID-19 dıagnozy rastalǵan adamdarǵa, naýqastardyń týystaryna, sondaı-aq koronavırýstyq pandemıaǵa baılanysty jumysynan aıyrylǵan adamdarǵa qandaı psıhologıalyq qoldaý kórsetiletini týraly ortalyq dırektory Sapar Rahmensheev Óńirlik komýnıkasıalar qyzmetiniń brıfıńinde aıtty, dep habarlaıdy Almaty-akshamy.kz
Sapar Rahmensheevtiń aıtýynsha, ortalyq bazasyndaǵy kovıdtik stasıonar jumys istep turǵan kezeńde aýrý aǵymynyń túrli dárejesimen 864 naýqas tústi, 435 naýqas shyqty, 8 adam qaıtys boldy.
Ol aýyr dárejeli barlyq naýqastarǵa koronavırýs ınfeksıasyna qarsy ekpe salynbaǵanyn atap ótti.
«Qazirgi ýaqytta biz bárimizde belgisizdik, kúızelis jáne COVID-19 ınfeksıasynyń qaýpi týraly alańdaýshylyq bar. Koronavırýstyq ınfeksıanyń taralýy búginde ýshyǵyp tur, jańa shtamdar, «tolqyndar» paıda bolýda», - deıdi Sapar Rahmensheev.
Almaty Psıhıkalyq densaýlyq ortalyǵynyń dırektory qazirgi jaǵdaıǵa baılanysty turǵyndar arasynda úreıge jol bermeý óte mańyzdy ekenin atap ótti. Maman karantındik shekteýler keıbir adamdardyń emosıonaldy jaǵdaıyna keri áser etetinin de aıtty.
«Biz koronavırýstyq ınfeksıasyna shaldyqqan naýqastardyń estý qabiletiniń nasharlaǵanyn, tez ashýlanatynyn, úreılenetinin, tipti agresıany baıqaımyz. Munyń bári olarǵa dert kezinde durys tynys almaýy saldaryna bolǵan psıhıkalyq aýytqýshylyq. Biraq, munyń bári ýaqytsha qubylystar. Emdelip shyqqan soń bizdiń mamandar pasıenttermen dári-dármektersiz, senim telefony arqyly jumys jasaıdy», - deıdi Sapar Rahmensheev.
Ol búginde qala turǵyndaryn tek vırýstan ǵana emes, sonymen birge aqparattyq aǵynnan da sekemdenetinin aıtty.
«Árıne, adamdar aqparat alýlary kerek, biraq jergilikti densaýlyq saqtaý organdary sıaqty senimdi kózderden alynǵan aqparatqa júginý kerek. Jalǵan aqparatqa senbegen abzal», - dep qosty Sapar Rahmensheev.
Ol almatylyqtardan ózin-ózi emdemeýdi, biraq suraqtar týyndaǵan jaǵdaıda Telemedısına ortalyǵynyń telefonyna habarlasýdy ótindi. Búginde 11 632 naýqasty dárigerler qashyqtan baqylaýda.