Saıabaq jıhazdary men sýburqaqtardy kútip ustaý talaptary
Almaty qalasynda qaýipsiz, yńǵaıly jáne ekologıalyq qolaıly qalalyq ortany qurý maqsatynda kóriktendirýdiń jańa erejesi engizildi. Bul jańa ereje saıabaq jıhazdaryn, qorshaýlar men sýburqaqtardy kútip ustaýdy qatań talap etedi, dep habarlaıdy almaty-akshamy.kz
Almaty komýnaldyq ınfraqurylymdy damytý basqarmasynyń basshysy Dýlat Áshkenov atap ótkendeı, jańa erejede buryn bolmaǵan normalar bar. Baý-baqsha jıhazdary, músinder men shaǵyn sáýlet nysandary taza ári jaramdy kúıde bolýy tıis.
"Kóktemgi ýaqytta shaǵyn sáýlet nysandary tekserilip, tazartyldy, boıalyp, synǵan elementteri aýystyryldy. Qorshaýlar mindetti túrde tekseriledi jáne tıisti tehnıkalyq jaı-kúıge keltiriledi, qajet bolsa syrlanady. Sonymen qatar, sýburqaqtar jumys istegen kezde kúndelikti tazartylady," - dedi Dýlat Áshkenov.
Kóriktendirý jumystaryn qala ákimdiginiń qurylymdyq bólimsheleri, aýmaqty abattandyrýdy, kútip ustaýdy jáne paıdalanýdy júzege asyratyn jeke jáne zańdy tulǵalar qamtamasyz etedi. Almaty ákimdigi megapolıs aýmaǵyn kóriktendirý jáne jınaýdy uıymdastyrý máselesi boıynsha jeke jáne zańdy tulǵalardyń qyzmetin úılestiredi.
Almaty qalasy Qoǵamdyq keńesiniń múshesi Borıs Japarov jańa kóriktendirý erejesin qoldaıdy. Onyń aıtýynsha, jańa ózgerister shahar turǵyndarynyń jaýapkershilik deńgeıin arttyrýǵa múmkindik beredi.
"Kóptegen almatylyq qalanyń syrtqy kelbetine shaǵymdanady. Alaıda bizdiń shahardy kóriktendirýdiń damýy jaýapty organdarǵa ǵana baılanysty emes. Birinshiden, bul ár turǵynnyń jaýapkershiligi," - dedi sarapshy.
Esterińizge sala keteıik, 2024 jyldyń 19 shildesinde VIII saılanǵan máslıhattyń kezekten tys XXI sesıasynda depýtattar Almaty qalasynyń aýmaǵyn kóriktendirýdiń jańa erejesin bekitti. Bul sharalar "Taza Qazaqstan" respýblıkalyq aksıasynyń maqsatyna sáıkes keletin qaýipsiz, yńǵaıly ári ekologıalyq jaıly qalalyq orta qurýǵa baǵyttalǵan.