Kez kelgen adam, meıli ol úlken ne kishi bolsyn, tańerteń úıinen biri – jumysqa, ekinshisi – sabaqqa ne balabaqshaǵa shyǵady. Al keshke bári sol jyly uıasyna, ıaǵnı otbasyna oralady. Bir-birimen qaıta qaýyshady. Búgingi kúnderiniń qalaı ótkenin bir-birine jarysa áńgimelep, qyzyqtarymen bólisip jatady. Bárimizdi qushaǵyna syıdyryp turatyn otbasymyzdyń bolǵany qandaı ǵajap! Sondyqtan da otbasy – qasterli uǵym. Ol – bárimizdiń júregimizge eń jaqyn aıaýly sóz.
Álem jurtshylyǵyna «temir hanym» atanyp ketken áıgili áıel, 1979–1990 jyldary Ulybrıtanıanyń premer-mınıstri bolyp, únemi at ústinde júrgen Margaret Techerden bir áriptesimiz «Ómirdegi eń úlken jetistigińiz ne?» dep suraǵanda, ol esh oılanbastan «Otbasyn quryp, ana bolǵanym» degen eken. Demek, dúrkiregen qyzmet te, jer-jahanǵa jaıylǵan ataq-dańq ta otbasynyń janynda eshteńe emes.
Otbasy – mahabbat pen meıirimniń, qýanysh pen merekeniń uıasy. Ony shýaqqa bóleıtin, árıne, balalardyń ý-shýy, rıasyz kúlkisi. Sol balalar jyly uıasynan qanatyn qataıtady, býynyn bekitedi. Ata-anasynyń kórsetip bergen jolymen úlken ómirge sapar shegedi. Jaqsy bala sol jaqsylyqty keıin eselep qaıtarady, alǵan ulaǵatyn ata-anasyna, baýyrlaryna, aǵaıyn-týysyna, qala berdi eline kórsetedi. Otbasy – memlekettiń ýyǵy.
Keshe Almaty qalasynyń Jumyspen qamtý jáne áleýmettik baǵdarlamalar basqarmasy men Almaty qalasy Polısıa departamenti jergilikti polısıa qyzmeti basqarmasy áıelderdi zorlyq-zombylyqtan qorǵaý bólimshesiniń qoldaýymen «Daǵdarys ortalyqtarynyń odaǵy» ZTB, kópbalaly «Baqytty otbasy» ortalyqtary jáne «Jansaıa» daǵdarys ortalyǵy «Otbasy – baqyt mekeni» atty otbasylyq baıqaý ótkizdi. Oǵan Almaty qalasynyń aýdandarynan kópbalaly otbasylar qatysty. Berekeli de merekeli shańyraqtarǵa Almaty qalasy Jumyspen qamtý jáne áleýmettik baǵdarlamalar basqarmasy basshysynyń orynbasary Danıar Álkebaıuly izgi lebizin arnap, sáttilik tiledi.
MEDEÝ AÝDANYNAN «Arman» degen atpen qatysqan 4 balaly otbasynyń otaǵasysy Nurjan Arman – eńbekqor jan. Sportty serik etedi. Otanasy – Maıgúl qolynan túrli is keletin ónerli áıel, ıaǵnı programmıst, massajıst, shashtaraz. Al balapandary – kúres, taý shańǵysy, shahmat jáne gımnastıkaǵa qatysady. Bı bılep, sýret salyp, án de aıtady. Sahanaǵa 4 bala da túrli medaldaryn taǵyp shyqqanda, kózimiz súısindi.
JETİSÝ AÝDANYNAN kelgen «Asanovtar otbasy» da 4 bala tárbıelep otyr. Otaǵasy Serǵalı Qalıbaev – qoly sheber qurylysshy, otanasy Merýert – ulaǵatty ustaz. Balalary bilim jaǵynan da, óner jaǵynan da mektebiniń maqtanyshy.
ÁÝEZOV AÝDANYNYŃ atynan qatysqan «Abdrahmanovtar otbasy» 5 bala tárbıelep otyr. Úı ıesi Ashır Abdrahmanov – áskerı qyzmetker. Qyzmetine saı qatal tártiptiń adamy bolsa da, júregi názik, án salatyn óneri bar. Al otanasy Qarshyǵa zamanaýı massaj túrlerin jasaıdy. Balalary da ata-anasyna uqsaǵan ónerli. Uldary dzúdo, fýtbol, bokspen aınalysyp, qyzdary án salyp, bı bıleıdi.
ALMALY AÝDANYNAN «Temirjandar áýleti» keldi. Otaǵasy Aýǵan soǵysynyń ardageri bolǵan. Óte yntymaqty otbasy. Otanasy – Qaljan Jumabaıqyzy ulaǵatty ustaz, qazirgi tańda temirjol salasynyń qyzmetkeri. Án salady. 4 balasynyń óte meıirimdi bolyp ósip kele jatqanyna senimdi.
NAÝRYZBAI AÝDANYNAN qatysqan 4 balaly «Altaevtar otbasy» da salaýatty ómir saltyn ustanady. Otaǵasy – Oljas İńkárbekov ınjener-qurylysshy, otanasy Altynhan – aq halatty abzal jan. Bul otbasynyń balalary da ónerden quralaqan emes.
TÚRKSİB AÝDANYNYŃ atynan shyqqan 6 balaly «Mýsabaevtar áýleti» – qolónerdi otbasylyq bızneske aınaldyryp, ulttyq naqyshty balalaryna da úlgi etip otyrǵan eńbekqor otbasy. Otaǵasy poıyz mashınısi bolyp eńbek etedi. Al otanasy – Kúlsara balabaqsha meńgerýshisi. Balalary dombyrany, sportty, ónerdi súıedi.
ALATAÝ AÝDANYNAN kelgen «Ómirbektiń otbasynda» súp-súıkimdi 5 bala ósip keledi. Olar da bir-birine baýyrmal. Án salady, sport úıirmelerine qatysady. Otaǵasy – Erik salmaqty, sabyrly. Al kelinshegi Janargúldiń jany jaısań jaıdarly jan.
Ár aýdannan sýyrylyp shyqqan otbasylar «Otbasy ustanymy», «Salt-dástúr sabaqtastyǵy» jáne «Ónerlige nur jaýar» atty bólimder boıynsha synǵa túsip, bir-birinen kem túsken joq. Aldymen barlyq otbasy bir-birlep ortaǵa shyǵyp, «Otbasy ustanymy» qandaı ekenin aıtyp ótti. Máselen, Almaly aýdanynyń turǵyny, Temirjandar áýletiniń otanasy Qaljan Jolmaǵambetova balalaryna ulttyq qundylyqtarymyzdy únemi aıtyp otyrýdan jalyqpaıtynyn jetkizdi. Dastarhan basyna otyrǵanda, tamaqty aldymen úıdegi úlken kisi bastamaı, basqalar qol salmaıtynyn, tamaqtan soń, úlkenderdiń ruqsatynsyz eshkim óz betinshe turyp júre bermeıtinin de atap ótti.
Alataý aýdanynda turatyn Ómirbektiń otbasy ortaǵa «Baspaldaqqa» bekitilgen sýretter alyp shyqty. Onda erli-zaıyptynyń jáne balalarynyń ár kezeńdegi fotolary jelimdelgen. Ideıasy – shaǵyn otbasynan búgingideı bıikke jetkenin kórsetý. Balalaryna «oınap júrip úıdegi baspaldaqtan súrinip ketseńder de, ómirde súrinbeńder» degen tilek arnady ata-anasy.
Baıqaýǵa Medeý aýdanynan qatysqan otaǵasy Arman Nurjan kishkentaı ulyna óz qoldarymen qaǵazdan jasaǵan appaq shańyraqty «balam, osy shańyraqtyń erteńgi ıesi – ózińsiń» dep ustatqany, sol shańyraqqa 3 qyzynyń ýyq bolyp shanshylǵany, sosyn erli-zaıyptynyń keregesin bekitkeni áserli shyqty. Kórermender osy sátte dý qol soqty.
Al ózderin «áke – kún, ana – aı, al balalarymyz jarqyraǵan juldyzdar» dep tanystyrǵan «Asanovtar otbasy» (Jetisý aýdany) «arqan tartý» ónerin kórsetip, qoshemetke bólendi. Kóptiń aldyna ata-anasymen shyǵyp óner kórsetken ul-qyzdary da erekshe máz.
Baıqaýǵa qatysqan shańyraqtar «Ónerli otbasy» (Asanovtar), «Sheber otbasy» (Mýsabaevtar), «Salaýatty otbasy» («Arman»), «Dástúrge berik otbasy» (Ómirbek áýleti), «Mýzykalyq otbasy» (Temirjandar), «Zamanaýı otbasy» men «Meıirimdi otbasy» (Altaevtar), «Yntymaqty otbasy» (Abdrahmanovtar) nomınasıalaryn jeńip alyp, baǵaly syılyqtar ıelendi.
Baıqaýdan tys kelgen ónerli balalar da án saldy, dóńgelene bı bıleıdi. Kishkentaı búldirshinder óziniń balǵyn qıalyndaǵy oılaryn túrli-tústi borlarmen asfáltqa bederledi. Tátti sýsyndar iship, kámpıtke toıdy. Asyr salyp oınady, shattandy. Mine, otbasy sáni – osy baldyrǵandar erteń Ádiletti Qazaqstandy jasaıdy!