Kórmege QR Ulttyq kitaphanasynyń qorynan 1500-ge jýyq basylym qoıyldy.
Almatydaǵy QR Ulttyq kitaphanasynda Konstıtýsıa kúnine arnalǵan keń aýqymdy «Konstıtýsıa – Qazaqstannyń turaqtylyǵy men órkendeýiniń negizi» atty bezendirilgen kitap kórmesi ashyldy, dep habarlaıdy Almaty-akshamy.kz.
Kórmege Táýke hannyń tusynda qabyldanǵan «Jeti jarǵy», qazaq halqynyń dástúrli ádep-ǵuryp zańdarynyń jınaǵy: memleket tarıhy men quqyǵy týraly ádebıetter qoıyldy. «Mádenı-mura» memlekettik baǵdarlamasy aıasynda jarıalanǵan «Qazaqtyń ata zańdary» qujattar men materıaldar jınaǵy da usynyldy.
«Kórmede tanymal zańger, otandyq zań ǵylymynyń damýyna, quqyqtyq memlekettiń qalyptasýyna, táýelsiz elimizdiń órkendeýine aıtarlyqtaı úles qosyp, zań ǵylymynyń barlyq salalary boıynsha zertteýler men monografıalar jazǵan zań ǵylymy men biliminiń damýyna aıryqsha serpin bergen zıaly tulǵalar basylymdaryna erekshe oryn berilgen», - dedi QR Ulttyq kitaphana qyzmetkeri Janar Ábdikerimova.
Mundaı basylymdar avtorlarynyń qatarynda S.Zımanov, S.Sartaev, Q.Mamı, I.Rogov, S.Sabıkenov, T.Kúltóleev, Ǵ.Saparǵalıev, G.Taımanov, Á.Erenov, S.Baısalov, Sh.Shaıbekov, N.Muhıddınov, S.Sahıpov, M.Baımahanov, M.Súleımenov, M.Nárikbaev, Ý.Jekebaev, T.Aǵdarbekov, Q.Halıqov, S.Tabanov, N.Óseruly, Z.Kenjálı, S.Ózbekuly, A.Ibraeva bar.
Ulttyq kitaphana qyzmetkeriniń aıtýynsha, Konstıtýsıa Qazaqstan halqyna eń bastysy - tańdaý quqyǵyn berdi.
«Ata Zań – bizdiń kúndelikti júris-turysymyzdy retteıtin, qaýipsizdigimizdi qamtamasyz etip, el bolashaǵynyń jarqyn bolýy úshin qoǵamdaǵy kelisim men tártipti saqtaıtyn eń mańyzdy qujat. Memleketimizdiń damýyna úles qosqysy keletin azamat sol qujatqa moıynsunyp, ony qurmettemeıinshe, eldiń damýyn oılaý múmkin emes. Árbir azamat ony qadirlep- qasterleýge, ardaq tutýǵa mindetti»,- deıdi ol.