Almatyda komendant saǵatyn buzǵany úshin 84 adam ákimshilik jaýapqa tartyldy. Bul týraly qalalyq polısıa departamentiniń bastyǵy Qanat Taımerdenov Almatynyń tynys-tirshiligin qalpyna keltirý jónindegi qalalyq shtab otyrysynda málim etti, dep habarlaıdy Almaty-akshamy.kz QazAqparatqa silteme jasap.
Onyń aıtýynsha, qaladaǵy qoǵamdyq tártipti qamtamasyz etýge jáne asa mańyzdy nysandardy qorǵaýǵa 3 800 polısıa men sarbaz jumyldyryldy. Sonymen qatar, ol Almatyda polısıa jáne áskerı qyzmetkerlerden qurylǵan jaıaý patrúlder úsh aýysymdy rejımde jumys istep jatqanyn aıtty.
«Qalada 5 blok-beket jumys istep tur. Oǵan 390 adam jumyldyrylǵan. Qorǵanys mınıstrligi áskerı qyzmetkerleri qalanyń barlyq mańyzdy strategıalyq nysandaryn qorǵap tur. Polısıa bankterdiń 49 esep aıyrysý bólimshesin kúzetke aldy», - dedi ol.
«Terorızmge qarsy operasıa bastalǵaly ishki ister organdaryna jalpy 2300 adam jetkizildi. Olardyń 236-sy qaraqshy jáne jappaı tártipsizdikke qatysqandar boldy, olar qamaýǵa alyndy. 84 adam komendanttyq saǵatty buzǵany úshin ákimshilik jaýapqa tartyldy», - dedi Qanat Taımerdenov.
Spıkerdiń sózinshe, 7 qarý-jaraq dúkeninen 1 347 qarý urlanǵan. Osyǵan qatysty arnaıy tergeý toby quryldy. Osy sátke deıin 127 qarý tárkilendi, onyń 58-i ańshy dúkeninen urlanǵany anyqtaldy.