Almatyda kólikterdi turaqqa qoıý erejelerin buzýdyń 40-tan astam deregi anyqtaldy, – dep habarlaıdy almaty-akshamy.kz.
Jergilikti reıdter iri shaharda jol qaýipsizdigin qamtamasyz etý, sondaı-aq quqyq buzýshylyqtar úshin jazanyń bultartpastyǵy qaǵıdasyn júzege asyrý maqsatynda júrgiziledi.
– Jergilikti is-shara kólik quraldaryn turaqqa qoıý erejelerin buzý derekterin anyqtaýǵa baǵyttalǵan. Almaty sıaqty iri qala úshin bul óte ózekti másele. Búginde Almatyda 550 myńnan astam kólik resmı tirkelgen. Sonymen qatar shahar joldarynda kúnine 300 myńǵa jýyq tranzıttik kólik júredi. Sondyqtan árbir jol qozǵalysyna qatysýshynyń jeke jaýapkershiligin sezinip, jol qozǵalysy erejelerin qatań saqtaýy óte mańyzdy. Patrúldik polısıa ekıpajdary aýyr quqyq buzýshylyqtardy sonyń ishinde kólikti turaqqa qoıý erejelerin anyqtaýǵa jáne jolyn kesýge baǵyttalǵan. Saýda úıleri, bazarlar, oqý oryndarynyń aımaǵy, meshitter jáne júrgizýshiler kólikterin belgilenbegen jerge jıi koıatyn basqa da oryndar erekshe nazarda, – dedi Almaty qalasy PD jergilikti polısıa qyzmeti basqarmasy bastyǵynyń orynbasary Tımýr Noǵaıbaev.
Aıtpaqshy, bir ǵana reıdte tártip saqshylary kólikterdi turaqqa qoıý erejelerin buzýdyń 40-tan astam deregin anyqtady. Quqyq buzýshylarǵa Qazaqstan Respýblıkasynyń zańnamasyna sáıkes sharalar qoldanyldy. Polısıa qyzmetkerleri bul is-shara júrgizýshi tártibi men kólik júrgizý mádenıetin arttyrýǵa oń áserin tıgizetinine senimdi.