Ol kólik salasynyń ókilderin qozǵalys qaýipsizdigi men sıfrlyq tehnologıalardy engizý máselelerin talqylaý úshin biriktirdi.
Qazaqstan Respýblıkasynyń Kólik vıse-mınıstri Sátjan Ablalıev forýmnyń ashylýynda onlaın formatta quttyqtaý sóz sóıledi. Óz sózinde ol mınıstrliktiń kólik salasyn sıfrlandyrýǵa baǵyttalǵan birqatar mańyzdy jobalary týraly aıtyp ótti, dep habarlaıdy aqshamnews.kz Kólik mınıstrligine silteme jasap.
Atap aıtqanda, ol ótinish berýsiz-aq azamattarǵa jeńildetilgen jol júrý bıletterin avtomatty túrde berýge múmkindik beretin proaktıvti formatqa kóshirý boıynsha júrgizilip jatqan jumystar týraly habarlady.
Sátjan Ablalıev jol jabynyn qorǵaý sharalaryna da nazar aýdardy. Osy tarapta vedomstvo jergilikti atqarýshy organdarmen birlesip, joldarǵa túsetin júktemeni baqylaý maqsatynda júk avtokóliginiń salmaǵyn ólsheıtin avtomattandyrylǵan stansıalardy ornatýǵa kiristi.
«Bıyl elimizdiń bas qalasy - Astanaǵa kireberisterde osyndaı jeti stansıa ornatyldy. Aldaǵy jyldary olardyń sanyn respýblıkalyq joldarda 70-ke, oblystyq jáne jergilikti avtodoralarda 150-ge deıin arttyrý josparlanýda», - dep atap ótti Vıse-mınıstr.
Forýmǵa QR Kólik mınıstrliginiń, ulttyq tasymaldaýshylardyń, «KAZLOGISTICS» Kólik qyzmetkerleri odaǵynyń, ınjenerlik júıelerdi óndirýshileriniń, ǵylymı uıymdardyń, konsaltıńtik kompanıalardyń, sondaı-aq, bilim berý jáne komersıalyq emes mekemelerdiń ókilderi qatysady.
Atalǵan is-shara aıasynda qatysýshylar avtomobıl jáne temirjol salalaryndaǵy sıfrlandyrý men qaýipsizdikti, áýe jáne sý kóligin damytýdy, sonymen qatar, kólik-logıstıka salasy úshin kadrlar daıarlaý máselelerin talqylaıdy.
Forým eki kúnge jalǵasyp, qatysýshylarǵa tájirıbe almasýǵa jáne kólik ınfraqurylymyn odan ári damytý úshin sheshimder usynýǵa múmkindik beredi.