Almaty qalasyndaǵy M. Tynyshpaev atyndaǵy logıstıka jáne kólik akademıasynda V-shi kóliktegi qaýipsizdik jáne sıfrlandyrý boıynsha Eýrazıalyq forýmy ótti.
İs-shara barsynda kólik salasyndaǵy ózekti trendter, ınovasıalyq sheshimder men sıfrlandyrý máseleleri keńinen talqylandy, dep habarlaıdy aqshamnews.kz Polisia.kz-ke silteme jasap.
Oǵan Ázirbaıjan, Reseı, Qyrǵyzstan temir jol ákimshilikteriniń, QR kólik mınıstrliginiń, “KAZLOGISTICS” kólikshiler odaǵynyń, ǵylymı-zertteý jáne bilim berý uıymdarynyń ókilderi, sondaı-aq kóliktegi polısıa departamentiniń basshylyǵy qatysty. Forýmda temirjol kóliginde qozǵalys qaýipsizdigin qamtamasyz etý boıynsha ózekti máseleler qaraldy.
Qatysýshylar poıyz qozǵalysynyń qaýipsizdigi salasyndaǵy ozyq tehnologıalarymen jáne olardy qoldaný tájirıbelerimen bólisti. Basqosý barysynda “Qazaqstan temir joly” UK” AQ jumysynyń negizgi baǵyttary aıtyldy. Sondaı-aq temir joldaǵy oqys oqıǵalardyń aldyn alý boıynsha basym mindetter qoıyldy. QTJ spıkerleri qabyldanǵan keshendi sharalar men kóliktegi PD qyzmetkerlerimen birlese júrgizilgen profılaktıkalyq is-sharalardyń arqasynda jyljymaly quramnyń adamdar men qaraýsyz jaıylyp júrgen úı janýarlardy qaǵyp ketýi, sonymen qatar, ótkelderdegi jol-kólik oqıǵalarynyń azaıǵanyn atap ótti. Taraptar bul baǵyttaǵy jumystardyń ári qaraı jalǵasatynyna senim bildirdi.
Forýmda temirjoldaǵy qoǵamdyq qaýipsizdik pen tasymaldanatyn múlikterdiń saqtalýyn qamtamasyz etýge zor úles qosyp júrgen birqatar qyzmetkerler marapattaldy. Olardyń arasynda kóliktegi polısıa departamenti bastyǵynyń mindetin atqarýshy Madıar Aıtýǵanov ta bar. Polısıa polkovnıgi “Qazaqstan temir jolynyń 120 jyldyǵyna” arnalǵan merekelik medalimen marapattaldy. Shara sońynda qatysýshylar zamanaýı quraldardyń, VR tehnologıalarynyń, sıfrlyq qaýipsizdik sheshimderiniń kórmesin tamashalady.