Almatyda kólik ıelerinen 50 mıllıon teńgeden astam ákimshilik aıyppul óndirildi, dep habarlaıdy almaty-akshamy.kz Polisia.kz. silteme jasap.
Qalada “Boryshker” jedel aldyn alý is-sharasy aıaqtaldy. Naýqan barysynda ákimshilik polısıa, jergilikti polısıa qyzmetiniń qyzmetkerleri, sondaı-aq prokýratýra ókilderi men jeke sot oryndaýshylary ákimshilik aıyppuldardy óndirip aldy.
– Eki kún ishinde atqarýshy organ qyzmetkerlerimen birge memlekettik búdjetke 50 mıllıonnan astam teńge jınaldy. Aıyppuldary tólenbegen 32 avtokólik mamandandyrylǵan aıyppul turaǵyna qoıyldy, 298 júrgizýshi 35 mıllıon teńgeden astam somaǵa ákimshilik aıyppuldar boıynsha bereshegi bar ekendigi týraly habarlandyryldy. Sondaı-aq, buryn jeke sot oryndaýshylarymen 71 mıllıonnan astam somaǵa buǵat qoıylǵan kólikter ustaldy, – dedi polısıa departamenti ákimshilik polısıa basqarmasynyń bastyǵy Nurlan Amanbek.
Mysaly, jalpy somasy 600 myń teńgeden asatyn ákimshilik aıyppuldar boıynsha bereshegi bar turǵyn anyqtaldy. Qaryzy tolyq ótelgenshe onyń kóligi de arnaıy turaqqa qoıyldy. “Alımenchık” te ustaldy, onyń qaryzy 546 myń teńgeni qurady, tólemegen adamnyń kóligi de aıyppul turaǵyna qoıyldy.
Aıyppuldardy májbúrlep óndirýdi boldyrmaý úshin polısıa departamenti avtokólik ıelerine ákimshilik aıyppuldy ýaqytynda tóleýdi usynady.