Almaty qalalyq polısıa departamentiniń málimetinshe, kólik quralyn basqarý quqyǵynan aıyrylsa da, kólik tizginine otyrǵan júrgizýshini izdeýdiń jańa tehnologıasy paıda boldy, dep habarlaıdy almaty-akshamy.kz
«Búginde elde jol-kólik oqıǵalarynyń aldyn alý men jol qaýipsizdigin qamtamasyz etýge erekshe kóńil bólip jatyr. Zań deńgeıinde kólikti mas kúıinde basqarǵany úshin jaýapkershilik kúsheıtildi. Endi bul quqyqbuzýshylyq úshin 7 jyl merzimge kólik basqarý quqyǵynan aıyrý, sondaı-aq 15 táýlikke ákimshilik qamaýǵa alý qarastyrylǵan. Ókinishke oraı, is júzinde sot júrgizýshi kýáliginen aıyrǵan júrgizýshi ózi úshin tıisti qorytyndy jasamaı, mas kúıinde qaıtadan rólge otyratyn jaǵdaı jıi kezdesedi. Al mundaı nemquraıdylyq qaıǵyly jaǵdaıǵa ákelýi múmkin», – dedi Almaty qalalyq polısıa departamentiniń bastyǵy Qanat Taımerdenov.
Osyǵan oraı, Almaty polısıasynyń aldyńǵy qatardaǵy bólimsheleriniń jeke quramy jol qozǵalysyna qatysýshylarǵa naqty qaýip tóndiretin buzýshylardy anyqtaýǵa jáne ustaýǵa jumyldyrylǵan. Polısıada iske qosylǵan jańa qyzmet kólik quralyn beınetirkeý júıesi arqyly anyqtaǵannan keıin, ony jedel ustaý jáne toqtatý úshin patrúldik jasaqtarǵa derekterdi berýge múmkindik beredi.
«Jazanyń bultartpas qaǵıdasy týraly taǵy bir eske salǵan jón. Búginde polısıa adamı faktordy joıyp, tártip buzýshylardy anyqtaýǵa, olardyń zańsyz áreketterin esepke alýǵa jáne jaýapqa tartýǵa múmkindik beretin avtomattandyrylǵan júıelermen jabdyqtalǵan. Jyl basynan 1,5 myńnan astam júrgizýshi kólikti mas kúıinde basqarǵany úshin sot kólik aıdaý quqyǵynan aıyrdy, onyń 245-i mas kúıinde jol-kólik oqıǵasyn jasady, taǵy 168-i júrgizýshi kýáliginen aıyrylǵan bolsa da, mas kúıinde rólge otyrǵan», – dep túıindedi Qanat Taımerdenov.
Sonymen qatar, Almaty qalalyq PD kólik kuralyn basqarý quqyǵynan aıyryla otyryp, kólikti aıdaý qylmystyq jaýapqa ákep soǵatynyn eskertedi.