Ánshi Qaraqat Ábildına “Ulytaý” tobynyń ataqsyz qalǵanyna qatysty renishti jazba jarıalady, dep habarlaıdy aqshamnews.kz
“Qazir áleýmettik jelide qozǵap jatqan másele týraly meniń de aıtarym bar! 25 jyl boıy dombyrany arqalap, 25 jyl boıy qazaqtyń únin álemge tanytyp, 25 jyl boıy mádenıet úshin tynymsyz eńbek etken “Ulytaý” toby taǵy da eleýsiz qaldy. Olar marapat surap otyrǵan joq. Biraq eńbektiń eskerilmeýi – ádiletsizdik. Olar – qazaqtyń brendine aınalǵan biregeı top. Mosart pen Qurmanǵazyny bir sahnada úndestire alǵan qubylys! Olar – etno-rokty ıdeologıa úshin sahnaǵa alyp shyqqan talant ıeleri. “Ulytaý” bolmasa, búgingi jastar kúıge dál osylaı ǵashyq bolar ma edi?! Dombyra dál osyndaı jańa tynys alar ma edi?! Stadıon toly halyq jınalar ma edi?!”, – dep jazdy Qaraqat óziniń ınstagramdaǵy paraqshasyna.
Sondaı-aq ánshi bul jazbasynyń jeke pikir ekenin eske saldy.
“Sonda qalaı?! Marapat kimge beriledi?! Halyqtyń júreginen oryn alǵan topqa osy ýaqytqa deıin resmı túrde bir japyraq qaǵaz da buıyrmaýy ádilet pe, aǵaıyn?! “Ulytaý” tobynyń prodúseri Qydyráliniń jary bolǵanym úshin ǵana emes, mádenıettiń janashyry, ulttyq rýhtyń únin kóterip júrgen ánshi, ana, azamat retinde aıtarym mynaý: “Ulytaýdy” marapattaý – kúıge, dombyraǵa, ulttyq rýhqa bas ıý. “Ulytaýdy” elemeý – ulttyq ónerdi, adal eńbekti elemeý! Siz qalaı oılaısyz?” – dedi ánshi.