Zardap shekkender joq.
Almaty qalasynda kókónis satatyn dúken órtenip, 2 gaz balony jaryldy, dep habarlaıdy Almaty-akshamy.kz QazAqparatqa silteme jasap.
Almaty qalalyq Tótenshe jaǵdaılar departamentiniń baspasóz qyzmetinen málim etkendeı, 5 jeltoqsan, túngi saǵat 23:19-da Bostandyq aýdany Tilendıev kóshesi, № 363/1 mekenjaıynda órt shyqqany týraly habarlama túsken.
«Órt sóndirýshiler oqıǵa ornyna 5 mınýtta jetti. Mamandar avtoturaqtyń aýmaǵynda ornalasqan kókónis satatyn dúkenniń janyp jatqanyn anyqtady. Órt sóndirýshiler kelgenge deıin joǵary temperatýraǵa baılanysty bir gaz balony jaryldy, ekinshi balon órt sóndirýshiler kelgen kezde jaryldy. Órt sóndirýshiler janyp jatqan ǵımarattan qaýipsizdik tehnıkasyn saqtaı otyryp, 50 lıtrlik 2 gaz balonyn alyp shyqty», – dep habarlady qalalyq Tótenshe jaǵdaılar departamentinen.
Vedomstvo málimetinshe, zardap shekkender joq, avtoturaqta turǵan kólikter órt pen jarylystan aman. Jalyn 4 mınýtta oqshaýlandyrylyp, 23:36 mınýtta tolyq sóndirildi. Oqıǵanyń mán-jaıy anyqtalyp jatyr. Órttiń shyǵýyna kináliler QR Ákimshilik quqyqbuzýshylyq týraly jáne Qylmystyq kodeksterge sáıkes jaýapqa tartylmaq.