Shahar kene ensefalıtiniń taralýy boıynsha endemıalyq aýmaq
Qalady jyl saıyn kene ensefalıtin juqtyrý jaǵdaılary tirkeledi. Medısınalyq uıymdarǵa jyl saıyn kene shaǵýmen 3 myńnan astam adam júginedi, dep habarlaıdy Almaty-akshamy.kz.
“Epıdemıalyq maýsymnyń basynan bastap aǵymdaǵy jyldyń 13 qazanyna deıin Almaty qalasynyń medısınalyq uıymdaryna keneler shaǵýyna baılanysty 3068 adam júgindi, onyń ishinde balalar sany - 1513. 2021 jyldyń uqsas kezeńimen salystyrǵanda turǵyndardyń kene shaǵýy boıynsha júginýiniń 23,5% - ǵa artqany baıqalady (2021 jyly - 2344 jaǵdaı/onyń ishinde balalar sany-1260). Kene shaǵýynan zardap shekken 3066 adamǵa seroprofılaktıka júrgizildi (99,9%)”, – dep habarlady Sanıtarlyq-epıdemıologıalyq baqylaý komıteti.
Bıylǵy jyldyń 9 aıynda barlyǵy 100 myń turǵynǵa shaqqandaǵy kórsetkishi 0,33 quraıtyn kene ensefalıtiniń zerthanalyq rastalǵan 7 jaǵdaıy tirkeldi, 2021 jyldyń uqsas kezeńinde kene ensefalıtiniń jaǵdaılary bolǵan joq.
100 myń turǵynǵa shaqqanda aýrýshańdyq kórsetkishi 0,42 quraıtyn Laım aýrýynyń (kene borrelıozynyń) 9 jaǵdaıy tirkeldi, bul kórsetkish 2021 jyldyń uqsas kezeńimen salystyrǵanda 2,8 ese joǵary (3 jaǵdaı, kórsetkish-0,15).
“Kene ensefalıtimen jáne Laım aýrýymen (kene borrelıozymen) aýyrǵandar medısınalyq kómek alý maqsatynda travmatologıalyq pýnktterge ýaqtyly júginbegen, tıisinshe kenege qarsy ımmýnoglobýlın almaǵan, sondaı-aq profılaktıkalyq maqsatta buryn kene ensefalıtine qarsy ekpe almaǵan. Dıagnoz qoıylǵannan keıin barlyq naýqastar qaladaǵy stasıonarlarda naqty em aldy, nátıjesinde saýyǵyp ketti”, – dep habarlady komıtette.
Sonymen qatar, kenelermen tasymaldanatyn aýrýlardyń spesıfıkalyq emes profılaktıkasy maqsatynda qala aýmaǵynda 2424,54 ga alańda akarısıdtik óńdeý júrgizildi. Eldi mekenderdiń saıabaq jáne orman aımaqtary, adamdardyń demalatyn jáne jappaı bolatyn oryndary óńdeldi.
Almaty qalasynyń sanıtarıalyq-epıdemıologıalyq baqylaý departamenti kene ensefalıtiniń aldyn alýdyń negizgi sharasy vaksınasıa ekenin eske salady. Vaksınasıalaý kýrsy 1-7 aı aralyǵyndaǵy eki vaksınadan turady. Kene ensefalıtine qarsy egýdi jyl boıy alýǵa bolady, biraq vaksınasıalaýdy ekinshi egý sátinen bastap keneni keziktirýge deıin keminde 2 apta ótetindeı etip josparlaý kerek. Eń ońtaıly kezeń - birinshi jáne ekinshi vaksınasıalaý arasyndaǵy ınterval 5-7 aı (birinshi egý kúzde, ekinshisi kóktemde).
Vaksınasıalaýdy kúzde bastaý kerek, óıtkeni epıdemıalyq maýsymnyń basynda adam aǵzasy ımýndyq qorǵanysty damytady jáne qaýipti ınfeksıaǵa qarsy tura alady. Turaqty ımýnıtet úshin bir jyldan keıin úshinshi ekpeni jasaý kerek. Sodan keıin ımýnıtetti saqtaý úshin úsh jyl saıyn revaksınasıalaý júrgizý qajet. Qalada egýdi turǵylyqty jeri boıynsha (nemese tirkelgen jeri boıynsha) aýmaqtyq emhanalarda dárigerdiń keńesinen keıin tegin alýǵa bolady”, – dep jazylǵan habarlamada.
Vaksına alǵan adamdar aýyrǵan jaǵdaıda aýrý jeńil túrde ótedi jáne saldary az bolady. Ýaqtyly vaksınasıalaý sizdi jáne jaqyndaryńyzdy kene ensefalıti aýrýynan qorǵaıdy.