Almatyda VIII shaqyrylǵan Almaty máslıhatynyń kezekten tys sesıasy ótip, onda depýtattardyń qaraýyna 2024-2026 jyldarǵa arnalǵan búdjet jobasy usynyldy.
Megapolıs ákimi Erbolat Dosaev jol ınfraqurylymyn jaqsartý jáne qoǵamdyq kólikti damytý josparyna toqtaldy, dep habarlaıdy almaty-akshamy.kz.
Ol bıyl qalanyń 70 kóshesinde 25 km jańa jol salynǵanyn atap ótti. Kelesi jyly Aqjar, Alǵabas, Álmerek, Qaırat, Shańyraq-1, Shuǵyla, Rahat-Mádenıet, Terekti shaǵyn aýdandarynda barlyǵy 70 km jol salý josparlanyp otyr. Bıyl 200 km jol ortasha jóndeýden ótse, 2024 jyly qalanyń jańa aýdandarynda 23 mlrd.teńgege 250 km jolǵa ortasha jóndeý júrgiziledi.
«Memleket basshysynyń tapsyrmasyna sáıkes, qoǵamdyq kólikti gazǵa jáne elektr tartqyshqa aýystyrý jónindegi ekologıalandyrý jumysy bastaldy. 2023 jyly 750 ekologıalyq taza avtobýs satyp alyndy, onyń 600-i qalalyq búdjet esebinen. Sońǵy 11 jylda alǵash ret Almatyda troleıbýs parkin jańartý bastalyp, 100 troleıbýs satyp alyndy. Bul rette, kelesi jyldan bastap Almatyda dızeldi avtobýstar satyp alynbaıdy. 2024 jyly jalpy somasy 88,3 mlrd. teńgege taǵy 600 avtobýs, 100 troleıbýs, sonymen qatar, 100 elektrobýs (2025 jyly taǵy 100) satyp alýdy josparlap otyrmyz», - dedi qala basshysy.
Buǵan qosa, elektr kóligin damytý úshin 2024 jyly trotýarlyq jáne alańdyq avtoturaqtarda 150 elektr qýattaý qurylǵysy ornatylady. 10 áleýetti jeke ınvestor tartyldy.
Jol ınfraqurylymyn damytý aıasynda bıyl «Buqtyrma kóshesi – Qulja traktisi» jańa jolaıyryǵy paıdalanýǵa berildi. 2024 jyly Abaı dańǵyly men Saıyn kóshesin uzartý aıaqtalady, ÚAAAJ baǵytyna qaraı qalǵan 3 radıaldy joldy qala shekarasyna deıin uzartý jalǵasady. Buǵan jergilikti búdjetten 6,4 mlrd. teńge jáne respýblıkalyq búdjetten 9,4 mlrd.teńge bólinedi. 927,3 mln. teńgege 4 ishki magıstraldyq joldy uzartý jalǵasady.
Seıfýllın-Jansúgirov kósheleri men Saıyn-Aqyn Sara (Móńke bı) kósheleriniń qıylysynda jolaıyryq salýdy jalǵastyrýǵa 5,6 mlrd. teńge qarastyrylǵan.
Alataý, Áýezov, Almaly, Bostandyq, Jetisý, Medeý jáne Túrksib aýdandarynda 25 retteletin jaıaý júrginshiler ótkeli salynady.
Jalpy, kelesi jyly kólik ınfraqurylymyn damytýǵa 244,1 mlrd. teńge bólý josparlanǵan.