Aldaǵy úsh jylǵa arnalǵan búdjetke sáıkes, 344 myń oqýshyny qamtıtyn 216 mektepti, 12 ınternatty jáne 20 kolejdi ustaýǵa shamamen 250 mlrd teńge bólinedi.
Almatyda kelesi jyly mektepterdi seısmıkalyq kúsheıtý jáne qaıta qurý, jańǵyrtý jumystary jalǵasady. Qalanyń 2025-2027 jyldarǵa arnalǵan búdjeti máslıhattyń kezekti sesıasynda maquldandy, dep habarlaıdy aqshamnews.kz
Mektepterdi qaıta qurý jáne seısmıkalyq kúsheıtý Almaty ákimdiginiń basym baǵytynyń biri bolyp qala beredi. Megapolıste jańa úsh jyldyq búdjettiń qabyldanýymen joǵary sapa standarttaryn saqtaı otyryp, oqý oryndaryn jańǵyrtý jalǵasady.
Memleket basshysynyń seısmıkalyq qaýipsizdikti qamtamasyz etý jónindegi tapsyrmalaryn oryndaý aıasynda 2025 jyly 3 mekteptiń seısmıkalyq kúsheıtý jumystary aıaqtalady, Túrksib aýdanyndaǵy №50 mektep-lıseıde jáne Áýezov, Bostandyq, Medeý aýdandaryndaǵy 7 bóbekjaı-balabaqshada seısmıkalyq kúsheıtý jumystary bastalady. Buǵan qosa, Zerdeli jáne Shuǵyla shaǵyn aýdandarynda 2 mekteptiń qurylysy aıaqtalyp, 12 mektepte qaıta qurý jumystary júrgiziledi. 2023-2024 jyldary qalada 11 mektepte kúrdeli jóndeý jáne seısmıkalyq kúsheıtý jumystary aıaqtaldy.
Sonymen qatar, 2025 jyly ulttyq «Jaıly mektep» ulttyq jobasy aıasynda 24,2 myń oryndyq 14 mektep paıdalanýǵa beriledi. Bul kelesi oqý jylyna deıin oqýshy oryndarynyń tapshylyǵyn «qajetti» deńgeıge – 3-4 myń orynǵa deıin tómendeıdi.
Qabyldanǵan sharalardyń arqasynda Almaty mektepterinde bir aýysymdy oqytýǵa kezeń-kezeńimen kóshý jalǵasýda. Kelesi oqý jylyna qaraı 200-den astam memlekettik mekteptiń 43-i (12,5%-dan 18,4%-ǵa deıin) bir aýysymdyq oqytý júıesine kóshedi.
Qala mektepteriniń ınfraqurylymyn jańǵyrtýǵa, damytýǵa erekshe nazar aýdarylady. Bıyl 89 mektepke 168 jańa modıfıkasıadaǵy kabınet satyp alyndy, bul zamanaýı pándik kabınettermen qamtamasyz etýdi 86,3%-ǵa jetkizdi.
Sonymen qatar, 2025 jyly Orbıta-3, Altyn besik, Quramys, Shuǵyla jáne №10 shaǵyn aýdandarynda 5 balabaqshanyń qurylysy men jańartýy jalǵasady. Bul Memleket basshysynyń 2025 jylǵa deıin 3 jastan 6 jasqa deıingi balalardyń 97%-yn mektepke deıingi bilimmen qamtý týraly tapsyrmasyn iske asyrý aıasynda jasalady.
Sondaı-aq, kelesi jyly Qaraǵaıly, Darhan jáne Nurkent shaǵyn aýdandarynda 3 balabaqsha salý josparlanyp otyr. Osy jumystardyń nátıjesinde mektepke deıingi mekemelerge 2 280 bala qabyldanady. Bul balalardyń erte bilim alýyna qoljetimdilikti arttyryp, megapolıstegi bilim berý sapasyn jaqsartýǵa aıtarlyqtaı yqpal etedi.