Almatyda kásipkerlerge memleketten qajetti qoldaý alýǵa kómektesetin quraldar tabysty jumys isteýde. Óńirlik komýnıkasıalar qyzmetiniń brıfıńinde Almaty qalasy kásipkerlik jáne ınvestısıalar basqarmasy basshysynyń orynbasary Qalıbek Aqylbekov «Bıznestiń jol kartasy» baǵdarlamasynyń jumysy týraly aıtyp berdi, dep habarlaıdy almaty-akshamy.kz
Spıker Almaty kásipkerlerine qarjylaı kómek kórsetý kólemi jyl saıyn ósip kele jatqanyn, al QR Prezıdenti Qasym-Jomart Toqaevtyń tapsyrmasy boıynsha «Bıznestiń jol kartasy» memlekettik baǵdarlamasy odan ári damıtynyn atap ótti.
«Bizdiń qalamyzda bızneske barlyq deńgeıde qoldaý kórsetiledi: oqytý, keńes berý, ınfraqurylymdyq, qarjylyq. Jyl saıyn «Bıznestiń jol kartasy» baǵdarlamasynyń búdjeti ósip, úsh jylda 31 mlrd teńgeni qurady. Bıyl búdjet 17,7 mlrd teńgeni quraıdy, bul ótken jylmen salystyrǵanda 2,2 ese kóp», - dedi Kásipkerlik jáne ınvestısıalar basqarmasy basshysynyń orynbasary.
Bólingen qarajattyń 690 mıllıony qaıtarymsyz granttarǵa, qalǵandary sýbsıdıalaýǵa jáne ishinara kepildendirýge baǵyttaldy. Spıker búgingi tańda 154 mlrd teńge nesıe somasyna 2 332 joba maquldanǵanyn qosty. Baǵdarlamanyń arqasynda 1 600-den astam jumys orny ashyldy.
Bul rette jobalardyń eń kóp sany saýda salalarynda – 17%, ákimshilik jáne qosalqy qyzmet kórsetýde – 15%, ónerkásipte – 13% qarjylyq qoldaý aldy. Budan basqa, jobalardyń 60%-y negizgi quraldardy, úı-jaılardy, jabdyqtardy satyp alýǵa qarjylandyrylady. Saýda salasynda nesıeler aınalym qarajatyna alynady.
Qalıbek Aqylbekov qarasha aıynda respýblıkalyq búdjetten «Bıznestiń jol kartasy» baǵdarlamasy boıynsha 1 mlrd teńge kóleminde qosymsha qarjy bólý josparlanǵanyn aıtty. Osylaısha, memleket bızneske qoldaý kórsetýdi jalǵastyrady, bul pandemıa kezinde óte mańyzdy.
Kásipkerlik jáne ınvestısıalar basqarmasy basshysy orynbasarynyń aıtýynsha, qoldanystaǵy túrli baǵdarlamalardyń arqasynda Almaty kásipkerleri ekonomıkalyq belsendilikti jalǵastyrýda, jumyssyzdyqqa jol berilmeıdi.
«Bizdiń qalamyzda daǵdarysqa qarsy túrli sharalar júzege asyrylýda, olardyń biri – shaǵyn jáne orta bıznes sýbektilerine memlekettik granttar usyný. Eger 2018-2019 jyldary jyl saıynǵy búdjet 145 mln teńgeni qurasa, orta eseppen 80 joba qarjylandyrylsa, 2020 jyly pandemıa kezinde qarjylandyrý somasy 5 mln teńgege deıin ósti», - dedi Qalıbek Aqylbekov.
Spıkerdiń aıtýynsha, ótken jyly jergilikti búdjetten 705 mln teńge bólingen. 2021 jyly bul úrdis saqtaldy jáne búdjet 700 mln teńgeni qurady.
«Kóktemde birinshi kezeńde 421 joba qaralyp, 513 mln teńgege 162 joba qoldaý tapty, onyń ishinde halyqtyń áleýmettik osal toptary sanaty boıynsha – 106 joba. Negizinen ónerkásip salasyndaǵy jobalar qarjylandyryldy, olar shamamen 69%-dy quraıdy. Qazirgi ýaqytta granttardy konkýrstyq irikteýdiń ekinshi kezeńi júrip jatyr. Qazirdiń ózinde 1 300 ótinim kelip tústi», - dep jalǵastyrdy sózin Qalıbek Aqylbekov.
Vedomstvo basshysynyń orynbasary Almatylyq kásipkerler ekonomıkalyq ósim qarqynyn jedeldetýge yqpal etip, jumys oryndaryn ashatynyn atap ótti.
«2020 jyly qarjylandyrylǵan jobalar monıtorıńiniń nátıjeleri boıynsha qazirgi ýaqytta jobalardyń shamamen 30%-y iske qosyldy, 105 jumys orny quryldy», - dep atap ótti spıker.
Sóziniń sońynda Q. Aqylbekov Almatynyń SHOB qala ekonomıkasynyń negizin quraıtynyn, sondyqtan oǵan Qoldaý kásipkerlik ortalyǵynda árdaıym kómektesýge daıyn ekenin atap ótti. Munda barlyq tilek bildirýshiler memlekettik qoldaý quraldary boıynsha, onyń ishinde «Bıznestiń jol kartasy» aıasynda tegin keńester ala alady. Ol úshin Baızaqov kóshesi, 303, 2 qabat «Investısıalar úıi» mekenjaıy boıynsha habarlasýǵa bolady.