2-den 4 balǵa deıingi jer silkinisteri Almaty úshin fondyq rejım
Jyl saıyn qaladan 80 km radıýsta 200-ge deıin álsiz jer silkinisi tirkeledi. 2- 4 bal Almaty úshin fondyq rejım. Bul týraly «Qalany damytýdyń 2025 jylǵa deıingi baǵdarlamasyn jáne 2030 jylǵa deıingi orta merzimdi perspektıvalaryn» bekitý boıynsha máslıhattyń kezekten tys sesıasynda ákim orynbasary Asqar Amrın málim etti, dep habarlaıdy Almaty-akshamy.kz QazAqpartqa silteme jasap.
«Tótenshe jaǵdaılar táýekelderin iske asyrýdan bolatyn saldarlardy barynsha azaıtý jáne apat aýdandarynan jasyrynýǵa nemese evakýasıalaýǵa ýaqtyly múmkindik berý úshin «Dármen» mobıldi qosymshasymen ushtasqan 9 seısmostansıa ornatý arqyly kúshti jer silkinisteri týraly erte habarlaý júıesiniń pılottyq jobasy engizildi. 4 jáne odan da kóp baldyq jer silkinisi bolǵan kezde qosymshany paıdalanýshylarǵa avtomatty túrde aldaǵy jer silkinisi týraly Push-habarlamalar keledi»,- deıdi ol.
Aıtýynsha, seısmostansıalardyń sany az bolǵandyqtan, «erte habarlaý júıesi» Almaty óńirin tolyq qamtı almaıdy. Budan basqa, qurylys salýshylardy mindetti seısmıkaǵa tózimdi qurylysty júzege asyrýǵa mindetteıtin standarttar men qala qurylysy normalary joq.
«Jyl saıyn qaladan 80 km radıýsta 200-ge deıin álsiz jer silkinisi bolady. Bul rette kúshi 2-den 4 balǵa deıingi jer silkinisteri Almaty úshin fondyq rejım. Almaty geografıalyq ornalasýyna baılanysty jer silkinisi alańy bolyp tabylatyn Ortalyq Azıanyń seısmıkalyǵy joǵary aımaqtarynyń birinde ornalasqan. Bir ǵasyrdan astam ýaqyt ishinde munda 8-11 baldyq tórt jer silkinisi boldy jáne 6, odan az baldyq kúshi bar 100 den asa jer silkinisi boldy. Qala sheginde barlyǵy 30 tektonıkalyq jarylymdar qıylysady, olar qalanyń búkil aýmaǵyn qamtıdy»,- deıdi spıker.