Almatyda Tólebaev pen Áıteke bı kósheleriniń qıylysynda jylý qubyry jaryldy.
Áleýmettik jelide Almatynyń ortylyǵynda jarylǵan jylý qubyry men odan tóbege atqylaǵan ystyq sýdyń vıdeosy paıda boldy, dep habarlaıdy almaty-akshamy.kz.
Qala ákimdiginen atap ótkendeı, «Almaty jylý jelileri» JSHS apattyq brıgadasy apatty dereý joıýǵa kiristi.
Qazybek bı – Panfılov – Áıteke bı – Qonaev kósheleriniń boıyndaǵy 1985 jyldan beri paıdalanylyp kele jatqan dıametri 400 mm qubyrdyń zaqymdanýyn jóndeý úshin ystyq sý men jylý berý ýaqytsha toqtatyldy.
«Jóndeý jumystary búgin túngi saǵat 23:00-ge deıin aıaqtalady. Turǵyndardan ýaqytsha qolaısyzdyqtarǵa túsinistikpen qaraýdy suraımyz», - delingen habarlamada.