Almatyda qala basshysy Erbolat Dosaevtyń tapsyrmasymen 2024 jyldyń sońyna deıin 15 myń qalalyq nysan pasporttalyp, 750 nysan múmkindigi shekteýli azamattardyń paıdalanýyna beıimdeledi. Bul týraly Almaty qalasynyń jumyspen qamtý jáne áleýmettik baǵdarlamalar basqarmasy málimdedi, dep habarlaıdy almaty-akshamy.kz
Bul sharalar «Almaty qalasyn damytýdyń 2025 jylǵa deıingi baǵdarlamasy jáne 2030 jylǵa deıingi orta merzimdi perspektıvalar» aıasynda júzege asyrylyp jatyr. Inklúzıvti qala qaǵıdattaryn engizý jáne Almatynyń sapaly ınfraqurylymyn damytý qalalyq ákimdiktiń basty mindetteriniń biri bolyp tabylady.
Pasporttaý prosesin avtomattandyrý úshin qalanyń sıtýasıalyq ortalyǵymen birlesip, eńbek shyǵyndaryn qysqartýǵa jáne obektilerdi pasporttaý men beıimdeýdiń barlyq kezeńderin naqty ýaqyt rejıminde baqylaýǵa múmkindik beretin mobıldi nusqa ázirlendi.
Sonymen qatar, 1 900 qoǵamdyq kólik aıaldamasy men 11 metro stansıasyn pasporttaý da josparlanǵan.
Áleýmettik qyzmetter portaly arqyly bıyl múgedektigi bar 42 959 adamǵa 16,9 mıllıard teńge kóleminde ońaltý quraldary men áleýmettik qyzmetter kórsetiledi dep josparlanýda. 1 mamyrǵa deıin «Invataksı» tasymaldaý qyzmeti úshin 100 mashına usynylǵan. 422 adam kreslo-arbalarmen, 552 adam sýrdoquraldarmen, 889 adam tıfloquraldarmen, 1 294 adam protezdeýmen jáne ortezdeýmen, 5 097 adam gıgıenalyq quraldarmen qamtamasyz etilgen.
Sanatorlyq-kýrorttyq emdeý qyzmetterin 1 586 almatylyq, jesteý tili mamanynyń qyzmetin 827 adam, al jeke kómekshini 3 265 adam paıdalandy.
«TenQogam» múmkindigi shekteýli adamdardy jumysqa ornalastyrý ortalyǵy» áleýmettik jobasy odan ári jalǵasýda.
Bul sharalar Almaty qalasynyń ınfraqurylymyn jaqsartý jáne ınklúzıvti qoǵam qurý baǵytynda úlken qadam bolyp tabylady.