Densaýlyq saqtaý mınıstrliginiń málimetine súıensek, búgingi kúni dárilik zattar men medısınalyq buıymdardyń memlekettik tiziliminde dárilik zattardyń 6925 saýda ataýy tirkelgen. Olardyń arasynda kólik quraldaryn basqarar aldynda qoldanýǵa tyıym salynǵan qandaı dáriler bar. Almaty-akshamy.kz tilshisi zerttep kórdi
Sonymen, kólik júrgizer aldynda ortalyq júıke júıesine áser etetin preparattarǵa tyıym salynady.
«Avtokólikti basqarý nemese jóndeý jumystary kezinde mıdyń isteý qabiletine áser etetin basqa da dárilik toptar bar. Keıbir dári-dármekter kólik júrgizý qabiletine birden áser etýi múmkin, keıde ony qabyldaǵannan kúnnen keıingi kúni de áseri tarqamaýy múmkin. Bul áserler resept boıynsha da, reseptsiz de dári-dármekterdi qabyldaý kezinde paıda bolýy múmkin. Áserler kóbinese alkogóldi bir mezgilde qoldanǵanda nemese basqa dári-dármektermen qosymsha áreketteskende kúsheıedi. Nátıjesinde sharshaý, bas aınalý, kózdiń aldy bulyńǵyrlanyp nemese kórý qabiletiniń buzylýy, uıqy keltirý, deneni qurystyrý jáne t.b. sıaqty belgiler paıda bolýy múmkin», - deıdi dárigerler.
Olardyń aıtýynsha, kóbinese dári-dármekterdi qabyldaýdan bolatyn qaýipti eskere bermeıdi.
«Ásirese, em alýdy bastaǵan kezde saqtanǵan jón. Oǵan dozanyń ózgerýi nemese dári-dármektiń ózgerýi áser etedi. Avtokólikti basqarý kezinde keri áser etýi múmkin keıbir dárilik toptardyń tizimi: analgetıkter (aýyrsynýdy jeńildetý úshin qoldanylatyn dáriler); antıdepressanttar (aýyr depressıalyq buzylýlardy emdeý úshin qoldanylatyn dáriler); dıabetke qarsy preparattar (qandaǵy glúkozany tómendetý arqyly qant dıabetin emdeý úshin qoldanylatyn dáriler); epılepsıaǵa qarsy preparattar (epılepsıalyq ustamalardy emdeý úshin qoldanylatyn dáriler); antıgıstamınder (alergıany emdeý úshin qoldanylatyn dáriler); gıpertenzıaǵa qarsy preparattar (joǵary qan qysymyn emdeý úshin qoldanylatyn dáriler); anksıolıtıkter (mazasyzdyqty emdeý úshin qoldanylatyn dáriler); uıyqtatatyn dáriler (uıqy problemalaryn sheshý úshin qoldanylatyn dáriler); antıpsıhotıkter", - dep atap ótti Densaýlyq saqtaý mınıstrligi.
Sonymen qatar, Qazaqstan Respýblıkasy Densaýlyq saqtaý mınıstrliginiń Medısınalyq jáne farmasevtıkalyq baqylaý komıteti qazirgi ýaqytta avtokólikti júrgizý kezinde medısınalyq dárilerdi ishýge tyıym salynǵan preparattardyń tolyq tizimi joq ekenin habarlady
"Tirkelgen dárilik zattar boıynsha aqparatty ndda.kz saıtynan jáne darikz mobıldi qosymshasynda tanysyp shyǵýǵa bolady. Sonymen qatar, kólik quralyn basqarý kezinde ishýge tyıym salynǵan dárilik zattardyń tizbesi joq", - dep tolyqtyrdy vedomstvo. Sonymen qatar, árbir dári-dármektiń qarsy kórsetilimderin muqıat oqyp shyǵýǵa keńes berdi.