Almaty qalasyn sıfrlandyrý.
Bul jaıynda qala ákimi Erbolat Dosaevtyń qatysýmen ótken máslıhat sesıasynda Almaty qalasynyń 2023-2025 jyldarǵa arnalǵan búdjet jobasyn qaraý barysynda aıtyldy, dep habarlaıdy Almaty-akshamy.kz.
Qazirgi ýaqytta qalalardyń básekege qabilettiligin anyqtaýdaǵy negizgi krıterıılerdiń biri ony sıfrlandyrý deńgeıi bolyp tabylady.
Negizgi joba Almaty qalasynyń «sıfrlyq egizin» engizý bolyp tabylady. Ol barlyq Smart-sıtı jobalaryn ortaq platformaǵa biriktirip, Biryńǵaı derekter qoımasyn damytýy tıis.
Bul joba komýnaldyq qyzmetter, memlekettik organdar jáne basqa da jeke kompanıalardyń derekterin durys ıntegrasıalaý arqyly qalany basqarý sapasyn jáne azamattardyń ómir súrý sapasyn jaqsartýǵa múmkindik beredi. Birinshi kezeńdi 2023 jyly iske qosý josparlanyp otyr, oǵan 956 mln. teńge qarastyrylǵan.
«2023 jyly turǵyndar úshin qosymsha proaktıvti servısterdi iske qosýdy oılastyryp otyrmyz. Jyl sońyna deıin adamdar kóp jınalatyn oryndarda 3 050 beınekamera, aýlalar men podezderde 4 244 beınekamera ornatylady (0,8 mln. teńge).
Sondaı-aq búginde sıntetıkalyq esirtki taratýshylar arasynda belgili Keńsaı shaǵyn aýdanynda qosymsha 223 beınekamera ornatylady», - dedi qala ákimi Erbolat Dosaev.
Jol qozǵalysynda qaýipsizdikti qamtamasyz etý úshin 2023 jyldyń sáýirine qaraı jelilik ýchaskeler men qıylystarda qosymsha 575 Sergek ornatý jobasy (3,3 mlrd. teńge) aıaqtalady.
Turǵyndar qalanyń kez kelgen jerinde ózderin qaýipsiz jáne jaıly sezinýi úshin kelesi jyly memlekettik-jekeshelik áriptestik aıasynda adamdar kóp jınalatyn oryndarǵa qosymsha 6 000 beınekamera ornatý josparlanýda.
Qalalyq beınebaqylaý kameralarynan alynǵan jazbalardy ortalyqtan basqarý jáne vıdeolardy taldaý úshin olar Biryńǵaı beınemonıtorıng júıesinde jınaqtalady, oǵan 1,2 mlrd. teńge kózdelgen.