Almatyda baǵdarshamdardy adaptıvti basqarý júıesin engizý aıaqtalady
Almatyda bıyl jol qozǵalysyn basqarýdyń avtomattandyrylǵan júıesi (JQBJ) jobasyn iske asyrý jalǵasady. Kóshelerdiń ótkizý qabiletin arttyrý maqsatynda júıege qalanyń barlyq baǵdarshamy qosylady, dep habarlaıdy almaty-akshamy.kz
Jobany iske asyrýdyń birinshi kezeńi 2021 jyly, JQBJ -ǵa 93 baǵdarsham qosylǵan kezde bastaldy. Sonymen qatar, ortalyq basqarý pýnktiniń úı-jaılaryn, mamandandyrylǵan jabdyqtardy qaıta jańartý júrgizildi jáne baǵdarlamalyq qamtamasyz etý ornatyldy. Sonymen birge, jalpy uzyndyǵy 56,5 km bolatyn jańa talshyqty-optıkalyq baılanys júıesi salyndy. Barlyq 93 baǵdarsham nysany eýropalyq elektrondy jabdyqtarmen tolyqtyryldy.
Almaty qalalyq mobıldilik basqarmasynyń habarlaýynsha, bıyl bastalatyn jobanyń ekinshi kezeńi aıasynda qalǵan 498 baǵdarsham nysandaryn jańǵyrtý josparlanýda. Jumys osy jyldyń ekinshi jartyjyldyǵynda Almaty ákimdiginiń jobalyq keńsesi aıasynda bastalyp, jyl sońyna deıin aıaqtalady.
«Sonyń nátıjesinde baǵyttar boıynsha naqty qozǵalys qarqynyn eskere otyryp, naqty ýaqyt rejıminde qıylystardaǵy jol qozǵalysyn retteý qamtamasyz etiledi. Iaǵnı, sensorlar men kameralar kelesi qıylysqa kóliktiń naqty sanyn jiberedi. Tıisinshe, keri sanaq taqtasy adaptıvti rejımde jumys isteıdi», - dedi qalalyq mobıldilik basqarmasy.
Bolashaqta júıege baǵdarlamalyq qamtamasyz etýdi biriktirý josparlanýda, bul qıylysta mamandandyrylǵan jáne qoǵamdyq kólikke basymdyq berýge jol ashady.
