Qaýipsiz Almaty: qaladaǵy ýchaskelik pýnktter qalaı ózgeredi
Almatyda polısıanyń servıstik modeli engizilýde. Servıstik qyzmet – bul barlyq jáne kez kelgen másele boıynsha quqyqtyq tártipti qorǵaýshylarǵa júginý azamattar úshin qoljetimdi degendi bildiredi.
Jańa model aıasynda jergilikti búdjet esebinen megapolıste «qadamdyq qoljetimdilik» qaǵıdaty boıynsha jumys isteıtin jáne polısıa men jergilikti turǵyndar arasynda áriptestik qatynastar ornatýǵa baǵyttalǵan 30 zamanaýı ýchaskelik pýnkt pen 16 servıstik ortalyq ashý josparlanǵan. Osy jobalardy sátti iske asyrý úshin «Qaýipsiz qala» baǵyty boıynsha Almaty qalasy ákimdigi janyndaǵy jobalyq keńse men QR İİM belsendi jumys júrgizip otyr.
Almatyda alǵashqy osyndaı ýchaskelik pýnkt (PÝP) osy jyldyń tamyz aıynda Naýryzbaı aýdanyndaǵy «Alem Sıtı-1» turǵyn úı kesheninde ashyldy. Bul TÚK-degi aýlalarda, kireberisterde, sonymen qatar, irgeles aýmaqtarda beınebaqylaý kameralary qoıyldy, bul quqyq qorǵaý organdaryna aýdannyń qaýipsizdigin táýlik boıy baqylaýǵa múmkindik beredi.
«Bizdiń PÝP aldymyzǵa birqatar mańyzdy mindet qoıyp otyr. Eń áýeli biz óz aımaǵymyzda qaýipsizdikti qamtamasyz etemiz. Bul oqıǵalarǵa jyldam áreket etýdi jáne qylmystyń aldyn alýdy qamtıdy. PÝP aqparatqa jyldam qol jetkizý úshin baılanys, beınebaqylaý jáne málimetter bazasymen qamtamasyz etilgen. Osynyń arqasynda biz syn-qaterge jedel den qoıyp, tergeýdi tıimdi júrgize alamyz», - dedi Almaty qalasy PD ÝMPS ýchaskelik polısıa ınspektorlarynyń qyzmetin uıymdastyrý bóliminiń bastyǵy, polısıa maıory Aıtan Eleýsizov.
Onyń aıtýynsha, PÝP-tyń turǵyn úı kesheninde ornalasýy ýchaskelik ınspektorǵa turǵyndarmen tıimdi qarym-qatynas jasaýǵa jáne jedel áreket etýge múmkindik beredi.
«Biz úshin taǵy bir mańyzdy mindet – turǵyndarmen ózara qatynasty kúsheıtý. Biz almatylyqtardyń bizge kez kelgen ýaqytta habarlasa alatynyn bilgenin qalaımyz. Sondyqtan halyqpen kezdesip túrli is-sharaǵa qatysamyz», - dep ýchaskelik polıseılerdiń QR İİM Akademıasynda oqyp jatqanyn aıtty.
Servıstik ortalyqtar týraly aıtsaq, olar azamattardyń kómegine shuǵyl nazar aýdarýǵa, jaǵymsyz oqıǵalardyń aldyn alýǵa, qalalyq polısıa bólimsheleriniń júktemesin azaıtýǵa, sonymen birge quqyq qorǵaý organdary jumysynyń tıimdiligin arttyrýǵa múmkindik beredi. Polısıanyń servıstik ortalyqtarynda tegin qyzmetterdiń 55 túri, onyń ishinde kóshi-qon, ákimshilik zańnama jáne basqa da zań máseleleri boıynsha konsýltasıalar kórsetiledi. Munda psıholog, medıator jumys isteıdi. Servıstik ortalyqtarda resepshn, kútý aımaǵy, balalar buryshy qarastyrylǵan.
İİO júıesinde ýchaskelik polısıa ınspektorlary eń kópfýnksıonaldy polısıa qyzmetin usynady. Olar quqyq buzýshylyqtar men qylmystardyń aldyn alýdyń, qoǵamdyq tártipti qamtamasyz etýdiń, turǵyn shaǵyn aýdandar men eldi mekenderdegi azamattardyń qaýipsizdiginiń negizi bolyp tabylady. Bıyl 8 aıda ýchaskelik ınspektorlar 2 myń 211 qylmysty ashyp, 63 myń 811 quqyq buzýshylyq anyqtaldy. Jalpy Almatyda qylmys 27,8%-ǵa tómendedi.