Almatyda jastar arasyndaǵy jumyssyzdyq deńgeıi tómendep keledi, dep habarlaıdy Aqshamnews.kz
Búginde Almatyda 14 pen 35 jas aralyǵyndaǵy 695,6 myńnan astam jas turady. Bul megapolıs halqynyń 32%-y. Onyń ishinde 442,3 myńy – jumys isteıtin jastar, 287,4 myńy – joǵary oqý oryndary men kolej stýdentteri, al 80 myńǵa jýyǵy – mekteptiń joǵary synyp oqýshylary.
Almaty qalasynyń Jastar saıasaty basqarmasy jastar arasyndaǵy jumyssyzdyqty azaıtý, ýaqytsha jáne turaqty jumysqa ornalastyrý, tájirıbeden ótkizý, kásiptik oqytý jáne mansaptyq baǵyt-baǵdar berý maqsatynda birqatar jobany júzege asyrýda.
Bul baǵyttaǵy negizgi quraldardyń biri – Jasalmaty.kz aqparattyq portaly. Onda «Jobfair365» jumysqa ornalastyrý servısi jáne «SkillBridge» onlaın oqytý men biliktilikti arttyrý platformasy jumys isteıdi. Mysaly, bul platformaǵa 25 myńnan astam biregeı qoldanýshy tirkelgen, 5 myńnan astam jumys berýshi 7 myńnan astam bos jumys ornyn jarıalaǵan. Sonyń arqasynda jyl basynan beri 3,5 myń jas turaqty jumys tapqan.
Sonymen qatar, jastardy jumysqa ornalastyrýda keshendi jumys júrgizip jatqan jobalardyń biri – Qalalyq mansap ortalyǵy. Buǵan deıin árbir oqý ornynda jeke mansap ortalyqtary bolsa, qazirgi tańda bul júıe jumys berýshilermen, eńbek utqyrlyǵy ortalyqtarymen jáne basqa qurylymdarmen biriktirilgen ortaq platformada jumys isteıdi.
2025 jyldyń basynan beri Qalalyq mansap ortalyǵyna 7,5 myń jas júgingen, onyń 5,7 myńy jumysqa ornalastyryldy.
«Birneshe aı turaqty jumys taba almaı, qaıda bararymdy bilmeı júrgende osy ortalyqqa tap boldym. Mundaǵy mamandar maǵan baǵytymdy anyqtap, túıindememdi durys jasaýǵa kómektesti. Sonyń arqasynda mamandyǵym boıynsha jumysqa ornalastym. Qazir oqý men jumysty qatar alyp júrmin», – deıdi Aldıar Nurymov.
Osylaısha, 2025 jyldyń basynan beri Almatyda 9,2 myńnan astam jas turaqty jumysqa ornalasqan. Aıta ketý kerek, Qalalyq mansap ortalyǵynyń qyzmetin qaladaǵy kez kelgen komúnıtı-ortalyqta paıdalanýǵa bolady.