Energetıkalyq sýsyndardy kóp ishýdiń saldary
Almatyda júrek-qantamyr júıesiniń aýrýlary jasaryp keledi. Bul týraly S.Asfendıarov atyndaǵy Qazaq ulttyq medısına ýnıversıtetiniń júrek-qan tamyrlary hırýrgıasy kafedrasynyń meńgerýshisi, Almaty qalalyq kardıologıa ortalyǵynyń dırektory Almat Qodasbaev málim etti, dep habarlaıdy Almaty-akshamy.kz QazAqparatqa silteme jasap.
Dárigerdiń aıtýynsha, burynda 60-70 jastan asqan qarttar júrek-qantamyr aýrýlarymen jıi shaǵymdanatyn. Al qazirgi tańda júrek aýrýynyń ártúrli formalary bar naýqastar kóbeıgen.
«Júrek aýrýlarynyń negizgisi – arterıalyq gıpertenzıa. Taǵy biri ınfarkt – bul stressten, emosıonaldy júktemeden, energetıkalyq sýsyndardy kóp ishýdiń saldarynan bolady. Bizge sondaı-aq energetıkalyq sýsyndardy ishýdiń salalarynan paıda bolǵan ártúrli júrek aýytqýlary bar naýqastar keledi», - dedi Almat Kodasbaev.
Ol qazirgi tańda energetıkalyq sýsyndardyń júrekke áseri týraly ǵylymı zertteýlerge durys kóńil bólinbeı jatqanyn aıtty.
«Bul sýsyndardy óndirýshiler ony aǵzaǵa zıandy dep sanamaıdy. Naýqastar anamnez kezinde energetıkalyq sýsyndardy shamadan tys tutynǵandaryn aıtady. Olardyń júrek kórsetkishteri ózgergen, jalpy patologıa bar. Energetıkalyq sýsyndarǵa tyıym salynbaıdy. Degenmen, densaýlyǵyn kútetin ár azamat jarnamasyna qaramaı, bul sýsyndardyń aǵzaǵa zıandy ekenin bilýi qajet», - dedi kardıohırýrg.
Dáriger mundaı jaman ádetterden bas tartýǵa, salaýatty ómir saltyn ustanýǵa, tutynatyn taǵamdardyń sapasyn qatań baqylaýǵa keńes berdi.
«Ár adam bala kezinen densaýlyǵyn kútý kerek. Qalypty tamaqtaný, jumys jáne demalys rejımin saqtaý kerek. Sonda júregińiz ǵaryshkerdikindeı bolady. Al ǵaryshkerde turaqty qan qysymy, turaqty ımpúls, qalypty dıapazondaǵy bıohımıalyq kórsetkishter bolady. Ǵaryshkerdiń densaýlyǵy osyndaı bolady», - dep túsindirdi kardıohırýrg Almat Kodasbaev.