Kólik Reseı Federasıasynda tirkelgen bolyp shyqty.
Avtomattandyrylǵan baǵdarlamalyq júıelerdiń málimeti boıynsha, osy Audi avtokóliginiń júrgizýshisi az ýaqyt ishinde 92 ret jol qozǵalysy erejesin buzǵan. Aıyppuldyń jalpy somasy 2,2 mln teńgeden astam somany qurady, dep habarlaıdy Almaty-akshamy.kz.
«Atalǵan buzýshylyqtardyń barlyǵy qalanyń beınejúıeleri arqyly tirkelgen. Júrgizýshi kóbinese jyldamdyqty buzǵan. Ony “Qorǵaý – qaýipti júrgizýshi” avtomattandyrylǵan júıesi arqyly anyqtap, ustaý múmkin boldy. Buryn habarlanǵandaı, Almaty polısıasy jalǵan memlekettik tirkeýish nómirlik belgilerin paıdalanatyn, kólikterge arnaıy belgi berý qurylǵylaryn ornatqan, kólikti mas kúıinde basqarǵan jáne tólenbegen aıyppuldary bar kólik júrgizýshilerin anyqtaý jáne jaýapkershilikke tartý boıynsha maqsatty jumystar júrgizilip jatyr. Jyl basynan beri “Qorǵaý – qaýipti júrgizýshi” kesheni qala joldarynda 3 myń 501 quqyq buzýshylyqty anyqtady», – deıdi Almaty qalalyq PD jergilikti polısıa qyzmeti basqarmasynyń bastyǵy Erjan Uzabaev.
Spıkerdiń aıtýynsha, jaqynda Almaty joldarynda júrgizýshilerdiń árqaısysy 800 myń teńgeden kem emes zańbuzýshylyq jasaǵan taǵy eki shetelde tirkelgen kólik ustaldy. Olardyń kólikteri de mamandandyrylǵan aıyppul turaǵyna ornalastyryldy. Almaty polısıasy ákimshilik aıyppuldardy der kezinde tóleý qajettigin taǵy da eske salyp, jol qozǵalysy erejelerin qatań saqtaýǵa shaqyrdy.