Ólimniń sebebin anyqtaý úshin sot-medısınalyq saraptama taǵaıyndaldy
Almatyda eki kún buryn joǵalyp ketken Vıktorıa Soldatovanyń denesi taýdaǵy ózen boıynan tabyldy, dep habarlaıdy Almaty-akshamy.kz.
Almaty qalalyq Polısıa departamentiniń málimetinshe, 18 qyrkúıek kúni Áýezov aýdandyq polısıa basqarmasyna jergilikti turǵynnan 1988 jyly týǵan ápkesi V.V.Soldatovanyń joǵalyp ketkendigi týraly aryz túsken.
«Aryzdanýshynyń aıtýynsha, 17 qyrkúıek kúni saǵat 10:00 shamasynda V.V.Soldatova úıden shyǵyp ketip, qaıta oralmaǵan. Sonymen qatar, sińilisiniń sózinshe, ápkesi óziniń jigitine taýǵa baratynyn aıtqan, sálden soń jigitke ózin órmekshi shaǵyp alǵany týraly jazǵan»,- dep habarlady vedomstvodan.
İzdestirý is-sharalary barysynda taýly aımaqta ózen boıynan V.V.Soldatovanyń denesi tabyldy. Máıitte zorlyq-zombylyq belgileri joq.
«Ólimniń sebebin anyqtaý úshin sot-medısınalyq saraptama taǵaıyndaldy. Tergeý barysy İshki ister mınıstrligi men Almaty qalalyq Polısıa departamenti basshylyǵynyń baqylaýynda»,- dep atap ótti polısıadan.
Almaty polısıasy jalǵan aqparat taratpaýǵa shaqyrady jáne QR QK-niń 274-babyna sáıkes jaýapkershilik týraly eskertedi.