Ol 1976-1987 jyldary Mádenıet mınıstri qyzmetin abyroımen atqardy.
Almatyda qazaq óneri men mádenıetine súbeli úles qosqan memleket jáne qoǵam qaıratkeri Jeksembek Erkimbekovke arnalǵan eskertkish taqta ashyldy, dep habarlaıdy Almaty-akshamy.kz Almaty.tv-ge silteme jasap.
Saltanatty jıynǵa qaıratkerdiń jaqyndary, zıaly qaýym ókilderi men mádenıet janashyrlary qatysty. Eskertkish taqta profesordyń 1972 jyldan beri sońǵy kúnine deıin turǵan úıiniń irgesine qoıyldy.
«Ol kisi óte bir mádenıetti, shynynda da mádenıet mınıstri bolýǵa laıyq adam edi. Minezi óte bıazy, eshkimge qatty sóılemeıtin. Jaqsy azamat bolǵan. Jańa Qazaqstanda osy kisiniń ónegesi, tazalyǵy balalarǵa, urpaqqa ónege bola ma dep oılaımyn», – dedi D. Qonaev atyndaǵy Eýrazıalyq zań akademıasynyń rektory Ómiráli Jalaırı.
Almaty oblysynyń Eskeldi aýdanynda týǵan Jeksembek Erkimbekov eńbek jolyn Qazaq radıo komıteti janyndaǵy ult-aspaptar orkestrinde, Qurmanǵazy atyndaǵy orkestrde dombyrashy bolyp bastaǵan. Keıinnen horeografıa ýchılıshesiniń, bı ansambliniń, Ortalyq Komıtette mádenıet bóliminiń jetekshisi boldy. 1976-1987 jyldary Mádenıet mınıstri qyzmetin abyroımen atqardy. Mınıstr bolǵan tusynda jańa teatrlar, fılarmonıalar, kitaphanalar, mádenı ortalyqtar men avtomýzeıler ashyldy.
«Mınıstr bolǵan kezinde qazaq óneri men mádenıeti erekshe damydy. Ony bar qazaq, búkil Alash jurty biledi. Qanshama daryndy talanttardyń ósýine, myqty óner qaıratkerleriniń juzdyzy janýyna jol ashty. Eń aldymen, ol óte adal adam bolatyn», – dedi aqyn Ámire Árin.