KVI boıynsha qaladaǵy epıdemıologıalyq ahýal órshı túsýde.
Óńirlik komýnıkasıalar qyzmetiniń baspasóz konferensıasynda Almaty qalalyq qoǵamdyq densaýlyq basqarmasy basshysynyń orynbasary Svetlana Sultanǵazıeva megapolıste kúnine 3700 qońyraý tirkeletinin, onyń 2700-i aýyrlyqtyń birinshi jáne ekinshi sanaty ekenin aıtty, dep habarlaıdy Almaty-akshamy.kz.
Shaqyrýlardyń shamamen 25-30%-y koronavırýstyq ınfeksıa men pnevmonıaǵa qatysty, jedel járdemge júginý sany eki ese ósti.
QDB ókiliniń aıtýynsha, Almatyda KVI boıynsha epıdemıologıalyq ahýal órshı túsýde. Svetlana Sultanǵazıeva derttiń kún sanap óse túskenin, dárigerler men epıdemıologtardyń jaısyz boljamdarynyń rastalyp jatqanyn atap ótti.
«Medısına qyzmetkerleriniń júktemesimen qatar, jedel járdemge júginý sany eki ese ósti. Qazirgi kezde kúnine 3700-ge deıin qońyraý tirkeledi, onyń 2700-i - birinshi jáne ekinshi sanattaǵy syrqattar. Shaqyrýlardyń shamamen 25-30%-y koronavırýstyq ınfeksıa men pnevmonıaǵa qatysty», - dedi Svetlana Sultanǵazıeva.
QDB basshysynyń orynbasary aýyr naýqastardyń sany artqanyn, búginde reanımasıa bólimsheleri 44%-ǵa tolǵanyn aıtty. Reanımasıa jáne ıntensıvti terapıa bóliminde 313 naýqas bar, al reanımasıalyq tósek-oryndardyń jalpy sany - 700.
ÓJJ apparatyna - 35 adam, ınvazıvti emes ÓJJ apparatyna - 140, High flow apparatyna 127 adam qosylǵan.
Búgingi kúni úıdegi 10045 naýqas AMSK men Telemedısına ortalyǵynyń mobıldi toptarynyń baqylaýynda úıde, sımptomsyz - 9520, jeńil jáne ortasha aýyr dárejedegi ári sımptomsyz naýqastar - 525.
Qazirgi kezde kovıdtik stasıonarlar bir mezgilde 7045 pasıentti qabyldaı alady, kovıd ortalyqtaryn keńeıtý máselesi qarastyrylýda.
Oqý-klınıkalyq ortalyqta, ftızıopýlmonologıa ortalyǵynda, gýmanıtarlyq-pedagogıkalyq kolejde koronavırýs juqtyrǵandar úshin qosymsha oryndar ashyldy. 4 tamyzdan bastap “Hak” medısınalyq ortalyǵyna 130 tósek-oryn qoıyldy.
«Ótken táýlikterde Almatyda koronavırýs ınfeksıasynyń 1531 jaǵdaıy tirkeldi. Qazirgi kezde ınfeksıalyq stasıonarda 4852 adam bar, onyń ishinde 241 bala», - dedi Svetlana Sultanǵazıeva.
3 jasqa deıingi balalar kovıdtik stasıonarlarda ata-analarymen birge jatyr.
Svetlana Sultanǵazıeva almatylyqtardy enjarlyqqa salynbaýǵa, koronavırýstyń jańa nusqalaryn juqtyrýdyń aldyn alýǵa, betperde kıip, qashyqtyqty saqtaýǵa, adamdar kóp jınalatyn jerlerge barmaýǵa shaqyrdy. Vaksınalanýdyń eń tıimdi ádis ekenin taǵy da eske saldy.
Almatyda osy kezge deıin barlyǵy 725 575 adam vaksınanyń 1-shi komponentin aldy. Ótken táýlikte 4 971 adamǵa ekpe jasaldy. Vaksınalanǵandardyń ishinde 60 jastan asqandardyń jalpy sany 99 587 adam.
Qalada medısınalyq uıymdarda, mektepterde, mádenıet jáne sport nysandarynda, bazarlarda jáne qalanyń SOSO-larynda 167 ekpe pýnkti bar (250-ge deıin ulǵaıtý múmkindigimen). 1038 adamnan turatyn 234 ekpe brıgadasy jumys jumyldyrylǵan.