«Qazgıdromet» mekemesiniń dereginshe, 23 qyrkúıek kúni tańǵy saǵat 5-ten bastap 24 qyrkúıek tańǵa deıin Almatyda jańbyr jaýyp, keı jerde onyń mólsheri 20 mm-ge deıin jetýi múmkin. Batystan soqqan jeldiń jyldamdyǵy 3–8 m/s bolyp, ekpini 18 m/s-qa deıin jetedi. Kúndiz aýa temperatýrasy +17…+19 °S bolady dep boljanyp otyr.
24 qyrkúıekke qaraǵan túni jaýyn-shashyn jalǵasady, al kúndiz kún ashyq bolady. Soltústik-shyǵystan soqqan jeldiń jyldamdyǵy 3–8 m/s. Temperatýra túnde +10…+12 °S, kúndiz +18…+20 °S shamasynda.
Sý basýy múmkin jaǵdaılardyń aldyn alý jáne olardyń saldaryn der kezinde joıý úshin qala boıynsha komýnaldyq jáne jedel qyzmetter táýlik boıy kezekshilik etedi.
Bul jumystarǵa «Almaty tazalyq» mekemesi men merdiger uıymdardyń 123 arnaıy tehnıkasy, 74 motopompa, 20 assenızator kóligi (onyń 13-i sý basý qaýpi bar oryndarǵa qoıylǵan), sondaı-aq 75 jedel brıgada tartyldy. Olardyń quramynda 425 jumysshy bar, barlyǵy motopompamen jáne qajetti quraldarmen jabdyqtalǵan.
Buǵan qosa, Almaty qalasy Qutqarý qyzmeti de kúsheıtilgen tártipte jumys isteıdi. Olardvń qaraýynda 1 assenızator kóligi men 15 motopompa bar.
Almaty qalasy Tótenshe jaǵdaılar departamenti tarapynan 53 arnaıy tehnıka men 246 qyzmetker tolyq daıyndyqta tur.