Almatynyń Indýstrıalyq aımaǵynda shyny ydys óndiretin zaýyt iske qosylady. Bul týraly «Almaty» áleýmettik-kásipkerlik korporasıasy habarlady.
6,4 myń sharshy metr aýmaqta ornalasqan kásiporyn jylyna 21,6 myń tonnadan astam ónim shyǵara alady. 58 jańa jumys orny ashylmaq.
Zaýyttyń ashylýy otandyq ishki naryqty tolyqtaı shyny ydyspen qamtamasyz etip, Reseı men Ózbekstannan keletin ımportqa táýeldilikti azaıtady.
Aıta keteıik, búginde elimizde úsh shyny zaýyty jumys isteıdi. Ekeýi Almatyda, biri Shymkentte. Qazir olar suranystyń jartysyn ǵana ótep otyr.
Jobany «Baǵdar LTD» JSHS «Almaty» ÁKK-niń enshiles uıymy – «Almaty Finance» JSHS qarjylaı qoldaýymen júzege asyryp otyr. «Almaty Business – 2025» baǵdarlamasy aıasynda zaýytty iske qosýǵa 500 mln teńge bólindi. Onyń ishinde 300 mln teńge jabdyq satyp alýǵa, iske qosý-retteý jumystaryna jáne logıstıkaǵa baǵyttalsa, 200 mln teńge aınalym qarajatyn tolyqtyrýǵa jumsaldy. Qarjylandyrý mólsherlemesi – jyldyq 6%, merzimi – 4 jylǵa deıin.
«Joba turaqty óndiristi damytýǵa jáne sırkýlárlyq ekonomıkanyń qaǵıdattaryn qoldaýǵa baǵyttalǵan. Shyny ydys shyǵarýmen qatar, zaýyt shyny synyqtaryn qaıta óńdep, qaldyqty kádege jaratý máselesin sheshýge jáne qorshaǵan ortany qorǵaýǵa úles qosady», – dedi «Almaty Finance» JSHS basqarma tóraǵasy Berik Qusaıynov.
Zaýyttyń shyny synyqtaryn qaıta óńdeýi óndiristik qaldyq kólemin azaıtyp, sırkýlárlyq ekonomıkanyń damýyna serpin beredi.