Qalalyq jumyspen qamtý ortalyǵy jaqynda jastarǵa arnalǵan 3 jármeńke ótkizýdi josparlap otyr
Almatyda bıyl 240 maman jastar is-tájirıbesinen ótip jatyr. Olardyń beseýi turaqty jumysqa kirip te úlgergen, dep habarlaıdy Almaty-akshamy.kz Almaty.tv-ge silteme jasap.
25 jastaǵy Nargız Halılova – «Jastar is-tájirıbesi» baǵdarlamasynyń jemisin kórgen maman. Tis dárigeriniń búginde turaqty jumysy, óz emdelýshileri bar. Ol oqý bitire sala, eki qolǵa bir kúrek izdep, bolashaǵyna alańdaı bastaǵan. Tipti bastapqyda tájirıbe jınaý úshin birneshe jerde tegin eńbek etkenin aıtady. Biraq jastarǵa arnalǵan baǵdarlamany estigende, maman bolyp qalyptasýǵa zor múmkindik ashylǵanyn túsingen. Onyń ústine, kásiptiń qyr-syryn úırenip júrip, jalaqy alý úlken motıvasıa, – deıdi jas maman.
«Jastar is-tájirıbesine» qujattarymdy tapsyrdym. Meniń usynysymdy qaladaǵy tis emdeıtin beldi emhanalardyń biri qabyl aldy. Bir jyl boıy kóp nárse úırenip, keıin osynda turaqty jumysqa ornalastym. Baǵdarlama maman retinde qalyptasýyma zor múmkindik berdi. Aıtarym, qujattardy tapsyrý qıyn emes. Ony bar bolǵany bir kúnde tapsyrdym. Eger nıet bolsa, alynbaıtyn qamal, baǵynbaıtyn beles joq», – dedi stomatolog dáriger Nargız Halılova.
«Jastar is-tájirıbesi» baǵdarlamasy 35 jasqa deıingi, dıplom alǵandaryna úsh jyldan aspaǵandardy jumyspen qamtýǵa kómektesedi. Oǵan qosa, 1 jyl kóleminde aı saıyn 40 aılyq eseptik kórsetkish kóleminde, ıaǵnı, 138 myń teńge jalaqy tólenedi. Iaǵnı, jas mamandar tájirıbe jınaýmen qatar, aılyq alyp otyrady. Eger ol ózin jaqsy jaǵynan kórsetse, tájirıbe aıaqtalmastan jumysqa ornalasýyna ábden bolady.
«Jastar tájirıbesine qatysý úshin eń aldymen enbek.kz portaly arqyly jumys izdeýshi retinde tirkeledi. Úsh jumys kúni ótken soń jumyssyz degen statýs alady. Portalǵa óz túıindemesin tirkep, óz mamandyǵy boıynsha portaldan jumys oryndaryn onlaın izdep, túıindemesin sáıkes kelgen mekemege jiberedi. Jumys berýshi enbek portaly arqyly túıindemeni kórip, jumysqa shaqyrtady. Suhbattasyp bolǵan soń, jumysqa qabyldanady», – deıdi Jumyspen qamtý ortalyǵynyń bólim mamany Aqbota Rysqulova.
Tipti bolmasa, qujattardy qalalyq jumyspen qamtý ortalyǵynyń mamandary arqyly da tirketýge múmkindik bar. Odan bólek, oqýǵa túse almaı qalǵan jastar úshin de baǵdarlama qarastyrylǵan. Máselen, Almatyda jyl basynan beri «Alǵashqy jumys orny» boıynsha 20 adam jumys tapsa, «Urpaqtar kelisimsharty» aıasynda 10 qatysýshy tájirıbeden ótip jatyr.
«Alǵashqy jumys oryndary» degen baǵdarlama bar. Ol baǵdarlamaǵa 16 jastan 35 jasqa deıingi, esh jerde eńbek ótili joq azamattar qatysa alady. Al «Urpaqtar kelisimsharty» degen baǵdarlama boıynsha belgili bir uıymda zeınetke shyǵýǵa 6 aı qalǵan qyzmetkerdiń qasyna jumysqa jiberiledi. Jastarǵa qoıylatyn talaptar - dıplom alǵanyna 2 jyldan aspaý kerek», – dedi Jumyspen qamtý ortalyǵynyń bólim mamany Aqbota Rysqulova.
Qalalyq jumyspen qamtý ortalyǵy jaqynda jastarǵa arnalǵan úsh jármeńke ótkizýdi josparlap otyr. Byltyr osyndaı 15 shara ótken eken. Bos jumys oryndary týraly aqparatty ortalyqtyń ınstagramdaǵy paraqshasynan kórýge bolady. Oǵan qosa, jastardy jumyspen qamtıtyn mamandar joǵary oqý oryndaryn aralap, baǵdarlamalar jaıly túsindirip te júr.