Almatyda «Aıbyn» X halyqaralyq áskerı-patrıottyq jastar jıyny bastaldy
Oǵan qatysý úshin Almatyǵa Ázerbaıjan, Belarýs, Qazaqstan, Qyrǵyzstan, Reseı jáne Ózbekstannan jas patrıottar komandalary keldi. Saıysta 14 pen 17 jas aralyǵyndaǵy barlyǵy 750 ul men qyz baǵyn synaýda.
Áskerı-patrıottyq jıyn Keńes Odaǵynyń Batyry, № 1 Halyq qaharmany, Táýelsiz Qazaqstannyń tuńǵysh qorǵanys mınıstri armıa generaly Saǵadat Nurmaǵambetovtyń týǵanyna 100 jyl tolýyna oraılastyryldy. Jıynnyń saltanatty ashylýy kórnekti áskerı qolbasshynyń esimimen atalatyn Qurlyq áskerleriniń áskerı ınstıtýtynda ótti.
İs-shara Saǵadat Nurmaǵambetov eskertkishine gúl shoqtaryn qoıýdan bastaldy. QR Qaýipsizdik Keńesiniń hatshysy Ǵızat Nurdáýletov, Qorǵanys mınıstri general-polkovnık Rýslan Jaqsylyqov, halyq batyrynyń qyzy Aısulý Nurmaǵambetova jáne sheteldik delegasıalardyń ókilderi Qurmet qaraýyl rotasynyń súıemeldeýimen Qazaqstan Qarýly kúshteri Ulttyq áskerı-patrıottyq ortalyǵy Ortalyq áskerı orkestriniń saltanatty áýenimen dańqty maıdangerdi eske aldy.
El prezıdenti Qasym-Jomart Toqaevtyń Qazaqstannyń jas patrıottaryna joldaýyn QR Qaýipsizdik Keńesiniń hatshysy Ǵızat Nurdáýletov oqydy. Onda jıynnyń áskerı qyzmettegi tártip pen jaýapkershilik, ózara kómek pen uıymshyldyq joǵary nátıjelerge qol jetkizý múmkindiginiń kepili ekeni aıtylǵan.
«Kez kelgen eldiń bolashaǵy jastardyń qolynda. Sondyqtan senderge úlken jaýapkershilik júktelip otyr. Sender adal jáne eńbekqor, aqyldy ári batyl, Otanymyzdyń laıyqty azamattary jáne naǵyz patrıottary bolýlaryń kerek. Barlyǵyń jıynǵa muqıat daıyndalyp, jeńiske jetem degen nıetpen keldińder. Mundaı jarysqa qatysýdyń ózi árqaısyń úshin mańyzdy jetistik jáne este qalarlyq oqıǵa», – delingen.
Qazaqstan Qorǵanys mınıstri general-polkovnık Rýslan Jaqsylyqov óz sózinde halyqtar arasyndaǵy burynnan kele jatqan berik baılanys qashanda ózara senim men qoldaýǵa negizdelgen dostyq qarym-qatynasta bolǵanyn atap ótti.
– Qanshama synnan ótsek biz ata-babalarymyzdyń dástúrlerin, qundylyqtary men mádenı-rýhanı muralaryn saqtaı aldyq. Búgingi halyqaralyq áskerı-patrıottyq jıyn – halyqtar arasyndaǵy dostyq pen kórshi eldermen tatýlyqqa degen umtylystyń jarqyn dáleli, – dep atap ótti ol.
General-polkovnık Rýslan Jaqsylyqov jıynǵa qatysýshylarǵa óz kúshterine senip, maqsatqa jetýde tabandylyq tiledi.
Olar úshin kaskaderler shoýy, batyrlar bıi, «Jasa, Saǵadat» mýzykalyq nómiri, Ortalyq áskerı orkestr men Qurmet qaraýyl rotasynyń defılesi bar merekelik baǵdarlama daıyndaldy.
Armıa generaly Saǵadat Nurmaǵambetovke arnalǵan «Halyq júregindegi qaharman» ekspozısıasy týraly QR Qarýly kúshteri Memlekettik áskerı-tarıhı mýzeıi Almaty fılıalynyń bastyǵy Alýa Baıqadamova aıtyp berdi.
İs-sharada Qorǵanys mınıstri general-polkovnık Rýslan Jaqsylyqov «General S.Q. Nurmaǵambetovtyń áskerı murasy jáne onyń qazirgi zamanǵy mańyzy» atty jańa kitapty tanystyrdy.
Ol 1-shi Túrkistan pýlemetshiler áskerı ýchılıshesiniń kýrsantynan armıa generalyna deıingi jaýyngerlik joldan júrip ótken soǵys batyrynyń Táýelsiz Qazaqstan armıasynyń qalyptasýy men damýyna qosqan zor úlesin atap ótti.
– Sol bir qıyn ýaqyttardaǵy onyń jaýyngerlik tájirıbesi, áskerıler arasyndaǵy joǵary bedeli men Otanǵa minsiz qyzmet etýdegi ónegesi Qarýly kúshterdi qurý men derbes damytýdyń kepili boldy, – dedi ol. – Armıa generaly Saǵadat Nurmaǵambetovtiń esimi elimizdiń tarıhyna altyn áriptermen jazylǵan.
İs-shara barysynda «Birlik ordasy» mobıldi-ınteraktıvti ekspozısıasy kórsetildi. Onda jıynǵa qatysýshy elder mádenıetiniń, dástúrleri men ádet-ǵuryptarynyń erekshelikterimen tanysýǵa bolady. Sonymen qatar «Jas sarbaz» respýblıkalyq áskerı-patrıottyq qozǵalysynyń tóraǵasy maıor Meıirbek Meńdiǵalıev «Saǵadat» kovorkıng-aımaǵyn tanystyrdy.
Jıynnyń burnaǵy jyldardaǵy jeńimpazdarymen jáne júldegerlerimen bolǵan kezdesýde «Jas sarbaz» qozǵalysynyń qazirgi tárbıelenýshileri olardyń ómir joly qalaı órilgenin estip bildi. Búginde olardyń kópshiligi elimizdiń áskerı oqý oryndaryn bitirip úlgerse, endi biri kýrsant.
Jıynnyń saltanatty ashylýyna deıin «Álı» oqý-jattyǵý ortalyǵynda ulttyq sport túrlerinen, AK-74-ti tolyq bólshekteý men qurastyrýdan birqatar jarystar uıymdastyryldy. Oǵan qosa jas ónertapqyshtar arasynda Smart Sarbaz baıqaýy men «Aıbyn daryny» zıatkerlik oıyny ótti.
Jarystar jalǵasýda. Bul apta qarqyndy bolmaq. Áskerı tehnıkanyń, jabdyqtardyń, sporttyq jabdyqtardyń kórmesi, klýbtardyń qyzmeti týraly stendterdiń bárin 18–22 maýsym aralyǵynda Qurlyq áskerleri áskerı ınstıtýtynyń «Álı» oqý-jattyǵý ortalyǵynan kórýge bolady. Sondaı-aq konsertter, dárister, sporttyq oıyndar, ot jaǵý keshteri jáne Halyq qaharmany týraly fılmder kórsetý josparlanǵan.