İs-shara Almaty qalasynyń kúnine oraı ótkizildi, dep habarlaıdy aqshamnews.kz.
Lagerdiń qatysýshylary retinde qaladaǵy 100 jas kóshbasshy tańdalyp, olarǵa tórt kún boıy paıdaly sheberlik sabaqtary men tabıǵat aıasyndaǵy belsendi is-sharalar uıymdastyryldy. Munyń bári Almaty qalasynyń Jastar saıasaty basqarmasynyń qoldaýymen júzege asyryldy.
«Lagerdiń basty maqsaty – jastar ortasyn qalyptastyrý, jastar saıasatynyń úzdik tájirıbeleri men ınovasıalyq salalaryn biriktirý. JAS CAMP jobasyna qatysý úshin irikteýden ótý qajet boldy, onyń negizgi krıterııleriniń biri – belsendi azamattyq ustanym, bastamashyldyq jáne qalanyń qoǵamdyq ómirine qatysý. Qazylar alqasynda qoǵam qaıratkerleri boldy. Barlyǵy 200 ótinim berilip, solardyń ishinen 100 jas kóshbasshy iriktelip alyndy», – dep málimdedi Almaty qalasy Jastar saıasaty basqarmasy basshysynyń mindetin atqarýshy Nursultan Bekqaırov.
Lager joǵary taýly «Aq Bulaq» kýrort-oteliniń aýmaǵynda ornalasqan. Qatysýshylar kotej úılerge ornalastyrylyp, taǵamdary uıymdastyrýshylar esebinen qamtamasyz etildi. Lager aıaqtalǵan soń jastarǵa arnaıy sertıfıkat beriledi.
JAS CAMP 2024 jastar lageriniń saltanatty ashylýy jańa býyn ókilderinen úlken qoldaý tapty. Quramynda ataqty qonaqtar, qyzyqty adamdar men konserttik baǵdarlamasy bar kesh keremet áser qaldyrary anyq. Taza taý aýasy, tabıǵattyń sulýlyǵy jáne yrǵaqty mýzyka keshti erekshe etedi.
İs-sharaǵa shaqyrylǵan qonaqtardyń qatarynda bloger Asqat Nurmashev, 2024 jylǵy Olımpıadanyń qola júldegeri Aleksandra Le jáne basqalar boldy.
– Bul jyl saıyn ótkiziletin mańyzdy is-shara. Óz qyzmetimniń aıasynda men elimizge paıda ákelýge tyrysamyn. Jastardyń qalaı damyp jatqanyn kórgenimde, bul meni qatty qýantady. Osyndaı JAS CAMP syndy jobalar óte qajet dep sanaımyn, sebebi jastar – bizdiń elimizdiń bolashaǵy, olardyń daǵdylaryn damytý men áleýetin ashýǵa kóbirek kóńil bólý kerek, – dedi Asqat Nurmashev.
Medet Turǵanjanov – Almaty qalasynyń «Assambleıa jastary» ókili.
– Munda barlyǵy keremet! Maǵan joba menedjmenti boıynsha sheberlik sabaǵy óte unady, sondaı-aq kásipkerler men medıa tulǵalarmen kezdesýler boldy, olar kóptegen jańa ári paıdaly aqparattarmen bólisti. Bul jobaǵa qatysý meni qatty shabyttandyrdy. Bilimimizdi keńeıtip, daǵdylarymdy jetildirip jatqanyma óte qýanyshtymyn. Mundaı lagerler jastarǵa jańa adamdarmen tanysýǵa, qarym-qatynas ornatýǵa, ártúrli adamdarmen jumys isteýge múmkindik beredi dep oılaımyn. Sondaı-aq lager ornalasqan jerdiń tabıǵaty óte ádemi, bul jerde biz oqyp, qalanyń qarbalasynan demalyp, jańa nárselerdi úırenip jatyrmyz. Lager uıymdastyrýshylaryna úlken alǵys aıtamyn, – dep óz pikirin bólisti Medet Turǵanjanov.
