1 shildede saǵat 13.00-den 20.00-ge deıin Almaty qalasynda 12 mm-ge deıin jańbyr jaýady, taýly aýdanda nóser jańbyr jaýady dep boljanyp otyr, dep habarlaıdy almaty-akshamy.kz.
Qalanyń komýnaldyq qyzmeti tas-túıin daıyn. Jaýyn-shashyn kezinde sý basýdyń aldyn alý jáne sýdyń kedergisiz aǵyp ketýi úshin motopompalarmen, bagrlermen jáne basqa da shans quraldarymen jabdyqtalǵan 52 jedel mobıldi brıgadanyń kezekshiligi uıymdastyrylady. 2,5 myń qap qum daıyndaldy.
Kúndizgi ýaqytta jaýyn-shashyn kezinde barlyǵy 465 birlik arnaıy tehnıka, 28 motopompa jáne 810 jumysshy jumyldyrylady.
«Qazgıdromet» RMK-nyń deregi boıynsha 30 maýsymda qalada 11 mm-ge deıin jaýyn-shashyn, al Kishi Almaty shatqalynda 28 mm-ge deıin jaýǵan qatty jańbyrdan keıin maýsym aıyndaǵy jaýyn-shashynnyń jartysyna jýyǵy (59 mm) túsip, qatty jeldiń saldarynan qulaǵan butaqtarmen, qoqys, laımen bitelgen aryq jelileri men jol astyndaǵy ótkelder 320 jumysshynyń jáne 92 birlik arnaıy tehnıkanyń kúshimen tazartyldy. Túngi ýaqytta 210 m3 qoqys shyǵaryldy.
Aýa-raıynyń buzylýyna baılanysty qala turǵyndary men qonaqtaryna taýǵa barýdy qoıa turý usynylady. Júrgizýshilerge aǵashtardyń qulaý jáne elektr jelileriniń úzilý qaýpine baılanysty avtokólikti jol jıegine qoımaýǵa keńes beremiz.
Sý tasqynynyń aldyn alý úshin qala turǵyndarynan aryq pen kanaldy qoqysqa toltyryp, bitep tastamaýdy suraımyz. Quqyq buzýshylar QR ÁQBtK-niń 505-baby boıynsha «Qalalar men eldi mekenderdiń aýmaqtaryn abattandyrý qaǵıdalaryn buzý, sondaı-aq ınfraqurylym nysandaryn buzý, qala men eldi mekenderdiń jasyl jelekterin joıý jáne zaqymdaý» boıynsha ákimshilik jaýapkershilikke tartylady.