Almatyda medısınalyq-sanıtarlyq alǵashqy kómekti (MSAK damytý aıasynda densaýlyq saqtaý salasy obektilerin salý boıynsha jobalar iske asyrylýda, dep habarlaıdy almaty-akshamy.kz
Búgin Jetisý aýdanynyń Kemel shaǵyn aýdanynda (Esimhan kóshesi 127) Almaty qalalyq №21 emhana fılıalynyń MSAK-tiń kezekti ortalyǵy ashyldy.Nysannyń qurylysy 2021 jyldyń qyrkúıeginde bastaldy.
MSAK ortalyǵy aýysymyna 200 kelýge eseptelgen. Qazirgi zamanǵy emdeý mekemesi 9 myń eresek jandarǵa jáne 3 myńnan astam balaǵa bilikti medısınalyq kómek kórsetetin bolady.
- Atalǵan ortalyqtyń ashylýy Kemel shaǵyn aýdany men jaqyn mańdaǵy aýdandardyń turǵyndaryn sapaly medısınalyq qyzmet kórsetýmen qamtýǵa jáne qoldanystaǵy úsh emhananyń: №21 BP, №11 BP jáne «Qulager» MSAK ortalyǵynyń júktemesin azaıtýǵa múmkindik beredi, onda bekitilgen halyq sany 156 myń adamdy quraıdy.
- Bes qabatty ǵımaratta tirkeý bólimi, kúndizgi stasıonar, terapıa, gınekologıa, balalar, stomatologıaly, ońaltý jáne fızıoterapıa bólimderi jáne t. b. ornalasqan.
- Ortalyqta qabyldaýdy joǵary bilikti mamandar júrgizedi: jalpy praktıka dárigerleri, terapevt, akýsher-gınekolog, nevropatolog, endokrınolog, kardıolog, LOR, okýlıs, alergolog, hırýrg – travmatolog, reabılıtolog.
- Sapaly medısınalyq kómek kórsetý úshin ortalyq zamanaýı qurylǵylarmen jabdyqtalǵan, olardyń ishinde: saraptamalyq klass apparattary - ÝDZ, EKG, defıbrıllátor, 3 dachıgi bar últradybystyq tústi skaner, sterıldi quraldardy saqtaýǵa arnalǵan últrakúlgin kameralar, stomatologıalyq keshen jáne basqalar.
Aıta keterligi, halyqqa medısınalyq qyzmet kórsetýdi damytý Almaty qalasy ákimdiginiń basty mindetteriniń biri bolyp tabylady. Qala boıynsha búginde Áýezov jáne Jetisý aýdandarynda 2 MSAK ortalyǵy jáne Jetisý aýdanynda 1 jańa emhana ashyldy.
Almaty qalasynyń biryńǵaı standarty boıynsha 11 MSAK ortalyǵy men emhanalardyń qurylysyna JSQ ázirlenýde (memlekettik saraptamanyń qorytyndysyn alýdyń jáne JSQ ázirleýdiń aıaqtalý merzimi – 2024 jylǵy I toqsan).
Biryńǵaı standart ozyq halyqaralyq tájirıbe negizinde ázirlengen alǵashqy medısınalyq-sanıtarlyq kómek kórsetýdi bildiredi.
MSAK biryńǵaı standarty jobalyq-tehnologıalyq sheshimderge, medısınalyq qyzmetter kórsetý reglamentterine, menedjmentke jáne sıfrlandyrýǵa 3 negizgi krıterıı boıynsha: qoljetimdilik, sapa jáne tehnologıalylyq tásilderin standarttaýdy kózdeıdi.
Qoljetimdilik krıterııi aýdandardy aımaqtarǵa bólý, pasıentter aǵynyn bólý, zamanaýı navıgasıa jáne ınklúzıvti orta qurý boıynsha biryńǵaı jobalyq-tehnologıalyq sheshimder keshenin qamtıdy.
Osy talaptarǵa sáıkes bekitilgen halyq sanyna baılanysty jabdyqpen jaraqtandyrýdyń jáne mamandarmen qamtamasyz etýdiń biryńǵaı standarttary ázirlendi. Mysaly, aýysymda 500 kelýshige arnalǵan MSAK úshin kem degende joǵary tehnologıalyq dıagnostıkalyq jabdyqtyń (MRT, KT, flúorografıa, sıfrlyq mammografıa, últradybystyq apparattar, endoskopıa, oftalmologıa jáne júkteme synaqtarynyń zamanaýı júıesi) zamanaýı jıyntyǵy bolýy tıis. Mamandardyń biryńǵaı standarty-kem degende mindetti 8 dárigerdiń (hırýrg, nevropatolog, travmatolog, kardıolog, oftalmolog, onkolog, endokrınolog, otorınolarıngolog) jáne eń kóp suranysqa ıe mamandyqtar boıynsha qosymsha 5 jeke mamandy (ýrolog, revmatolog, alergolog, pýlmonolog, gastroenterolog) qamtıdy.
Sonymen qatar, árbir emhanada halyqpen keri baılanystyń biryńǵaı standarty jasalady. Medısınalyq sheshimderdi taldaý jáne dıagnostıka, derekterdi ortalyqtandyrylǵan óńdeý úshin jasandy ıntellekt qoldanylady. Sondaı-aq, telemedısınany qosa alǵanda, qashyqtyqtan medısınalyq qyzmetter kórsetý jónindegi servıs damıtyn bolady.