Almaty Óńirlik komýnıkasıalar qyzmetinde ótken brıfıńte qala ákiminiń orynbasary Muhıt Ázirbaev megapolısti salý boıynsha jańa talaptar týraly aıtyp berdi, dep habarlaıdy Almaty-akshamy.kz
Onyń aıtýynsha, qurylystyń jańa erejeleri ótken jyly tarıhı ortalyqtyń saqtalýyn eskere otyryp qabyldandy. Olarǵa mektepterdi, balabaqshalardy jáne basqa da ınfraqurylymdy qadamdyq qoljetimdilikpen qamtamasyz etý boıynsha turǵyn úı keshenderin salýshylardyń mindettemesi de engizilgen.
«Abaıdan joǵary ál-Farabı dańǵyly men Jandosov kóshesine deıingi, Shyǵys aınalma jolynan Saın kóshesine deıingi ýchaskelerdegi turǵyn úı ǵımarattarynyń bıiktigi shekteledi. Sondaı-aq, taý baýraılarynda az qabatty TÚK (JK) salýǵa tyıym salynady», - dedi ol.
Turǵyn úı ǵımarattarynyń bıiktigin shekteý sebepteriniń ishinde ákim orynbasary mynany atap ótti:
- qalanyń tabıǵı jaǵdaılaryn da, sáýlettik dástúrlerin de eskermeıtin turǵyn úı ǵımarattarynyń tıpterin qoldana otyryp, jańa qurylysqa tán kelbettiń bolmaýy;
- burynnan bar sáýlet-landshaftyq kórikti jerlerdi saqtaý jáne anyqtaý qajettiligi;
- jaıly keńistik qurý jáne qalyptastyrý;
- qalanyń taý etegindegi turǵyn úı qurylysynyń joǵary tyǵyzdyǵy;
- áleýmettik jáne kólik ınfraqurylymynyń talap etiletin deńgeıiniń bolmaýy;
- ártúrli jaǵdaılarda, onyń ishinde qaýipsizdik bóliginde bıik turǵyn úı ǵımarattaryn paıdalanýǵa jáne olarǵa qyzmet kórsetýge qoıylatyn normatıvtik talaptardyń bolmaýy.
Osyǵan baılanysty kórsetilgen aýdandardaǵy ǵımarattar bıiktiginiń shekti parametrlerin 5 jáne 9 qabattan aspaıtyn etip salý usynylady.
Sondaı-aq, spıker eskirgen turǵyn úılerdi renovasıalaý baǵdarlamasyn odan ári iske asyrý týraly aıtyp berdi.
«Menshik ıeleriniń 100%-y jeke ınvestordy tartýdy qoldaıtyn úılerdi qospaǵanda, eskirgen turǵyn úı qoryn búdjet qarajaty esebinen renovasıalaý baǵdarlamasyn odan ári iske asyrý boıynsha sheshim qabyldandy», - dep habarlady ákim orynbasary.
Ol qazirgi ýaqytta qalada 1930-1975 jyldary salynǵan, paıdalaný merzimi ótken 1427 eki qabatty úı bar, onda 60 000-nan astam qala turǵyny turatynyn naqtylady. 6637 páterli 708 eski úıdi buzý jáne 34 605 páterli 683 turǵyn úı salý josparlanýda.
«Eski úılerdiń turǵyndary jańa turǵyn úı qoryna kóshiriledi, al buzylatyn turǵyn úı aýmaqtary qala muqtajyn qamtamasyz etý jáne jaıly ortany qalyptastyrý úshin paıdalanylady», - dep túsindirdi Ázirbaev.