Bul týraly Almaty Óńirlik komýnıkasıalar qyzmetiniń onlaın-brıfınginde qala ákiminiń orynbasary Muhıt Ázirbaev málimdedi, dep habarlaıdy Almaty-akshamy.kz
Spıker megapolıste 291 ǵımarat, onyń ishinde 62 ákimshilik ǵımaraty zardap shekkenin eske saldy.
«Ruqsat alǵan sátten bastap, 12-16 qańtar aralyǵynda órtten zardap shekken úı-jaılardy tazartý júrgizildi. QazQSǴZI «Qazaqstan» telearnasynyń, Bas prokýratýranyń ókildiginiń, Almaty polısıa departamentiniń jáne aýdandyq polısıa basqarmalarynyń ǵımarattaryndaǵy tehnıkalyq tekserýdi aıaqtady. Qalalyq ákimdik ǵımaraty boıynsha zertteý nátıjeleri 2022 jyldyń 28 qańtaryna kútilýde», - dedi ákim orynbasary.
Onyń aıtýynsha, irilendirilgen smetalyq norma boıynsha jalpy somasy 28,6 mlrd teńgege 10 nysandy qalpyna keltirý jumystarynyń aldyn ala quny eseptelgen.
«Qazaqstan» telearnasyn jáne qalalyq ákimdik ǵımarattaryn kúrdeli jóndeý men qaıta jańartýdy 1 tamyzǵa deıin aıaqtaý kózdelip otyr. Sondaı-aq, jeti nysanda, onyń ishinde Bas prokýratýra ǵımaratynda, sondaı-aq polısıa departamentiniń toǵyz ǵımaratynda aǵymdaǵy jóndeý jumystary bastaldy. Aǵymdaǵy jóndeýdiń barlyq nysandary boıynsha josparly aıaqtaý merzimi – 1 mamyrǵa deıin», - dep naqtylady Muhıt Ázirbaev.
Sonymen qatar, onyń aıtýynsha, bıznestiń áleýmettik jaýapkershiligi esebinen memlekettik organdardyń 28 nysanynda jóndeý jumystary júrgizilýde: bes densaýlyq saqtaý nysanynyń úsheýinde jumystar aıaqtaldy, úsh aýdandyq polısıa basqarmasynda olardy 28 qańtarǵa deıin aıaqtaý josparlanýda, zardap shekken 20 modýldik polısıa beketteriniń beseýi tolyǵymen órtengen – olardyń ornyna jańalary ornatylady, taǵy 15-i qalpyna keltiriledi, olardyń 9-ynda jumystar aıaqtalý satysynda.
«Búginde jumys komısıasy Almatyda 281 SHOB nysanyn anyqtady, onda jóndeý qajet, olardyń segizine kúrdeli. Zardap shekken nysandardyń jalpy sanynan 184-i boıynsha tehnıkalyq tekserý bastaldy, 87-i memlekettik saraptamaǵa joldandy, 24-i rastaldy. Qalǵan 97 SHOB nysany óz qarajaty esebinen qalpyna keltirilip, 13 nysanda jóndeý-qalpyna keltirý jumystary aıaqtaldy», - dedi qala ákiminiń orynbasary.
Spıkerdiń aıtýynsha, tártipsizdik kezinde 11 turǵyn úı zardap shekken. Olardy qalpyna keltirýdi osy aptada bastaý josparlanýda, 51 páterdiń terezeleri qaıta salynýda.