Almatynyń eki aýdanynda 3300 oryndyq jańa mektepter ashyldy.
Qala ákimi Baqytjan Saǵyntaev jumys sapary kezinde megapolıstiń Alataý jáne Naýryzbaı aýdandarynda salynǵan jańa oqý oryndaryn aralap kórdi, dep habarlaıdy Almaty-akshamy.kz
B. Saǵyntaev Naýryzbaı aýdanynyń "Qalqaman-2" shaǵynaýdandaǵy 1800 oryndyq №206 mektepti aralap kórdi. Mektepter zamanaýı jıhazdarmen, qajetti oqý qurylǵylarymen jabdyqtalǵan.
Almaty ákimi B. Saǵyntaev Alataý aýdanynyń "Tomırıs" shaǵynaýdanynda salynǵan №205 mektepte de boldy. Osy zamanaýı mekteptiń iske qosylýy 1500 oqýshy ornynyń tapshylyǵyn azaıtýǵa múmkindik berdi.
Oqý orny jıhazben jáne oqý tehnıkasymen tolyq jabdyqtalǵan ári óziniń alǵashqy oqýshylaryn kelesi toqsannan bastap qabyldaýǵa daıyn. Qazirgi kezde oqýshylardyń tizimi jasalýda.
Aıta keterligi, jańa mektepter tıptik jobalar boıynsha salynbaǵan. Jobalaý kezinde oqý oryndaryna qoıylatyn jańa standarttar arnaıy ázirlenip, qabyldandy. Olar zamanaýı sáýlet, oılastyrylǵan keńistiktik dızaın, keń synyptar men qoǵamdyq keńistikteri bar ergonomıkalyq ınterermen erekshelenedi.
Joba avtorlary ár orynnyń aýqymdylyǵyna qoljetkizýdi maqsat etti. Buǵan bal uıasy tárizdi kabınetter esebinen qol jetkizildi. Bul nysan úı-jaılardyń barynsha tabıǵı jaryqtandyrylýyn qamtamasyz etýge múmkindik berdi. Keń dálizder mektep ishinde erkin júrýge múmkindik beredi.
Munda balalar men muǵalimderdiń jaılylyǵy úshin barlyǵy jasalǵan. Mektepterde sport zaldary, asqana, zerthana jáne basqa da synyptar qarastyrylǵan. Aýmaqtarda stadıondar ornalasqan, barlyq keńistikter barynsha kógaldandyrylǵan.
Mektepter zamanaýı Face ID qaýipsizdik júıesimen jabdyqtalǵan. Ata-analar balalardyń kirýi men shyǵýy týraly habarlamalar alady. Úsh jaǵynan kiretin jeke toptar qaýipsiz sanıtarlyq-epıdemıologıalyq rejımdi qamtamasyz etýge múmkindik beredi.
Eske salsaq, buryndary Naýryzbaı aýdanynnyń "Aqjar" shaǵynaýdanynda №186 mekteptiń jańa korpýsy ashylǵan bolatyn. Kelesi jyly "Qalqaman" shaǵynaýdanda 1500 oryndyq mekteptiń, "Qarǵaly" shaǵynaýdanyndaǵy «Zerde» jeke menshik mektebiniń, "Shuǵyla" shaǵynaýdanynda 1200 jáne 1500 oryndyq eki mekteptiń, "Quramys" shaǵynaýdanynda 1200 oryndyq mekteptiń qurylystaryn aıaqtaý, №15 sanatorlyq-mektep ınternatty rekonstrýksıalaý josparlanǵan.
Sonymen qatar, Alataý aýdanynda bıyl 125 oryndyq №166 mekteptiń jańa korpýsy paıdalanýǵa berildi. "Saıaly", "Nurkent", "Darhan" jáne "Rahat-Mádenıet" shaǵynaýdandarynda 6300 oryndyq 4 mekteptiń qurylysy júrgizilýde. Olardy 2022 jyly tapsyrý josparlanǵan.
Sonymen qatar, "Saıaly-2" shaǵynaýdanynda 550 oryndyq jáne "Zerdeli" shaǵynaýdanynda 600 oryndyq mektep qurylystarynyń JSQ ázirlenýde. "Shapaǵat" shaǵynaýdanynda 600 oryndyq mektep qurylysy úshin №150 mektepke irgeles jer ýchaskelerin satyp alý boıynsha jumystar júrgizilýde.
Jalpy, Almatyda aǵymdaǵy jyly qalalyq búdjet esebinen 18 oqý orny salyndy, onda 11 563 oqýshy orny quryldy.