Almaty ákimi Erbolat Dosaev Túrksib aýdanynyń turǵyndarymen kezdesý barysynda aýdan turǵyndaryn sapaly medısınalyq qyzmettermen qamtamasyz etý úshin qabyldanyp jatqan sharalar týraly aıtyp berdi, dep habarlaıdy aqshamnews.kz
Onyń aıtýynsha, Nurshashqan shaǵyn aýdanynyń turǵyndary úshin bıyl bir aýysymda 100 adamnan asatyn qýaty bar otbasylyq-dárigerlik ambýlatorıa salyndy.
Qarasha aıynda ambýlatorıanyń ashylýy josparlanýda. Sonymen qatar, osy jyldyń shilde aıynda 10 brıgadaǵa arnalǵan №13 jedel medısınalyq járdem qosalqy stansıasy iske qosyldy. Bul qalanyń shyǵys bóliginde jedel járdem kelý ýaqytyn qysqartýǵa múmkindik berdi.
«Sport ınfraqurylymyn qurý jumystary jalǵasýda. «Jas Qanat» shaǵyn aýdanynda aǵymdaǵy jyldyń qazan aıynyń sońyna deıin kúnine 600 adam qabyldaı alatyn dene shynyqtyrý-saýyqtyrý keshenin ashý josparlanýda», – dedi qala basshysy.
Aıta keteıik, 2024 jyly Almatyda densaýlyq saqtaý ınfraqurylymyn jańǵyrtýdy qarjylandyrý 2,5 esege ulǵaıyp, 26,3 mlrd teńgege deıin jetti.