Almatyda jeke úıge qaraqshylyq shabýyl jasaldy
Qaraqshylyq shabýyl túngi saǵat úsh shamasynda oryn alǵan. Qaısenov kóshesindegi úılerdiń birine úsh adam basyp kirgen, dep habarlaıdy Almaty-akshamy.kz Polisia.kz-ke silteme jasap.
«Belgili bolǵandaı, olar aldyn ala belgilengen jospar boıynsha áreket etken. Shabýyl jasaǵandar úıde jalǵyzbasty áıeldiń turatynyn bilgen. Kúdiktilerdiń rólderi naqty bólingen: ekeýi qylmystyq nıetterin júzege asyrdy, bireýi jaǵdaıdy baqylaý úshin qaqpanyń janynda qaldy. Qaskóıler úı ıesin soqqyǵa jyqqan. Olar ózderimen birge quny 2 mıllıon teńgeden asatyn zergerlik buıymdardy alyp ketken. Aýyr qylmysty ashý maqsatynda qalalyq krımınaldyq polısıa qyzmetkerlerimen kúsheıtilgen jedel-izdestirý toby quryldy. Qaraqshylyq shabýyl ashyldy. Úsh kúdiktiniń ekeýi ustaldy. Qashqyndy qolǵa túsirý ýaqyt enshisinde. 37 jastaǵy J. esimdi azamat, sonymen qatar 25 jastaǵy S. esimdi azamat qamaýǵa alyndy. Aıtpaqshy, ekeýi de buryn bótenniń múlkin urlaǵany úshin jazasyn ótegen», – dedi Medeý aýdandyq polısıa basqarmasynyń bastyǵy Dáýren Ótebaev.
Ustalǵandardyń aıtýynsha, olar shabýyl jasamas buryn úıdi birneshe kún baqylaǵan. Olardyń oljasy ózara bólisip alǵan asyl tastar boldy. Keıbireýin satqan, al túsken aqshany óz qalaýlary boıynsha jumsaǵan.